बेइजिङ, २६ जेठ (रासस/एएफपी) । मध्यपूर्वमा जारी द्वन्द्वका कारण विश्व व्यापार तथा आपूर्ति शृङ्खलामाथि दबाब बढिरहेका बेला चीनको निर्यात मे महिनामा अपेक्षाभन्दा उल्लेख्य रूपमा वृद्धि भएको छ। मङ्गलबार सार्वजनिक सरकारी तथ्याङ्कअनुसार विश्वको दोस्रो ठूलो अर्थतन्त्र चीनको निर्यात गत वर्षको सोही अवधिको तुलनामा १९.४ प्रतिशतले बढेको छ।

चीनको भन्सार प्रशासन (जीएसी) का अनुसार मे महिनामा निर्यात वृद्धिदर अप्रिलको १४.१ प्रतिशतबाट बढेर १९.४ प्रतिशत पुगेको हो। ब्लुमबर्गद्वारा गरिएको अर्थशास्त्रीहरूको सर्वेक्षणमा निर्यात १५ प्रतिशतले वृद्धि हुने अनुमान गरिएको थियो। तर वास्तविक वृद्धिदर अनुमानभन्दा उल्लेख्य रूपमा उच्च देखिएको छ।

त्यसैगरी, चीनको आयात पनि अपेक्षाभन्दा बलियो देखिएको छ। मे महिनामा आयात वार्षिक आधारमा २७.४ प्रतिशतले बढेको छ, जुन ब्लुमबर्गले गरेको २६ प्रतिशतको पूर्वानुमानभन्दा बढी हो।

आयात र निर्यात दुवै क्षेत्रमा देखिएको मजबुत वृद्धिले चीनको अर्थतन्त्रमा बाह्य व्यापार अझै पनि महत्वपूर्ण आधारका रूपमा रहेको संकेत गरेको छ।

विशेषगरी संयुक्त राज्य अमेरिकातर्फको निर्यात उल्लेखनीय रूपमा बढेको छ। अमेरिकी राष्ट्रपति डोनाल्ड ट्रम्पको बेइजिङ भ्रमणका क्रममा व्यापार सम्बन्ध प्रमुख एजेन्डाका रूपमा रहेको अवस्थामा चीनको अमेरिकातर्फको निर्यात एक वर्षको अवधिमा ३५.४ प्रतिशतले वृद्धि भएको जीएसीले जनाएको छ।

तथ्याङ्कअनुसार मे महिनामा अमेरिकातर्फ चीनको निर्यात ३९ अर्ब अमेरिकी डलर पुगेको छ। गत वर्षको सोही अवधिमा यो रकम २८ अर्ब ८० करोड अमेरिकी डलर रहेको थियो। त्यसबेला ट्रम्प प्रशासनको व्यापार नीतिका कारण दुई देशबीचको व्यापारिक गतिविधिमा दबाब परेको थियो।

निर्यातमा आएको वृद्धि चीनको अर्थतन्त्रका लागि सकारात्मक संकेतका रूपमा हेरिएको छ। चीनले लामो समयदेखि उत्पादन तथा निर्यातमा आधारित आर्थिक मोडललाई विस्तारै घरेलु उपभोगमा आधारित बनाउने प्रयास गरिरहेको छ। तर अपेक्षाअनुसार आन्तरिक माग बलियो बन्न नसकेकाले बाह्य व्यापार अझै पनि अर्थतन्त्रको प्रमुख आधार बनेको छ।

यद्यपि चीनको अर्थतन्त्रले केही चुनौतीहरूको सामना गरिरहेको छ। कमजोर घरेलु माग, मध्यपूर्व द्वन्द्वका कारण बढ्दो ऊर्जा लागत तथा अन्तर्राष्ट्रिय ढुवानी व्यवस्थामा देखिएका अवरोधले आर्थिक गतिविधिमा दबाब सिर्जना गरिरहेका छन्।

आधिकारिक तथ्याङ्कले दुई महिनाको विस्तारपछि मे महिनामा चीनको उत्पादन क्षेत्रको गतिविधि लगभग स्थिर अवस्थामा पुगेको देखाएको छ। ऊर्जा तथा रासायनिक उद्योगसँग सम्बन्धित कच्चा पदार्थको मूल्य बढ्दै जाँदा उद्योगहरूको उत्पादन लागत पनि बढिरहेको छ।

ढुवानीमा देखिएका समस्या तथा आपूर्ति शृङ्खलामा परेको असरका कारण उत्पादन क्षेत्रले थप चुनौती सामना गरिरहेको विश्लेषकहरूको भनाइ छ।

यद्यपि यी चुनौतीहरूका बीच निर्यात र आयात दुवै क्षेत्रमा देखिएको अपेक्षाभन्दा राम्रो प्रदर्शनले चीनको बाह्य व्यापार विश्व आर्थिक अनिश्चितताका बीच पनि तुलनात्मक रूपमा मजबुत रहेको संकेत दिएको छ।