काठमाडौँ, २६ जेठ । काठमाडौँ महानगरपालिकाले आफ्नो भौगोलिक क्षेत्रलाई सडक सहयोगापेक्षी मानवमुक्त क्षेत्र घोषणा गरेको छ।
सोमबार आयोजित एक विशेष कार्यक्रममा महानगरपालिकाकी कार्यवाहक प्रमुख सुनिता डङ्गोलले “जो बेसहारा, काठमाडौँ महानगरपालिकाको अभिभारा” भन्ने नारासहित काठमाडौँलाई सडक सहयोगापेक्षी मानवमुक्त सहर घोषणा गर्नुभयो।
अभियानलाई प्रभावकारी रूपमा कार्यान्वयन गर्न महानगरपालिकाले नेपाल प्रहरी, जिल्ला प्रशासन कार्यालय काठमाडौँ तथा मानव सेवा आश्रमसँग त्रिपक्षीय सहकार्य र समन्वयका लागि सम्झौतासमेत गरेको छ।
भविष्यमा सडक वा सार्वजनिक स्थलमा भेटिने सहयोगापेक्षी व्यक्तिहरूको उद्धार, संरक्षण, व्यवस्थापन तथा पुनःस्थापनाका लागि एकीकृत प्रणालीमार्फत सम्पर्क, सहयोग, समन्वय र व्यवस्थापन गर्ने उद्देश्यले सम्झौता गरिएको हो। सम्झौतामा महानगरपालिकाका तर्फबाट कार्यवाहक प्रमुख डङ्गोल, नेपाल प्रहरीका तर्फबाट प्रहरी महानिरीक्षक दानबहादुर कार्की, जिल्ला प्रशासन कार्यालयका तर्फबाट प्रमुख जिल्ला अधिकारी ईश्वरराज पौडेल तथा मानव सेवा आश्रमका तर्फबाट अध्यक्ष रामजी अधिकारीले हस्ताक्षर गर्नुभएको थियो।
सम्झौतापछि बोल्दै कार्यवाहक प्रमुख डङ्गोलले काठमाडौँलाई सांस्कृतिक राजधानी मात्र नभई मानवता र सामाजिक उत्तरदायित्वमा आधारित सहरका रूपमा स्थापित गर्ने लक्ष्यका साथ यो अभियान सञ्चालन गरिएको बताउनुभयो।
कार्यक्रममा पूर्वगृहमन्त्री नारायणकाजी श्रेष्ठले मानवता प्रवर्द्धनको क्षेत्रमा अब कुनै कमजोरी हुन नहुने बताउँदै यस अभियानलाई सफल बनाउन सबै पक्ष जिम्मेवार र प्रतिबद्ध हुनुपर्नेमा जोड दिनुभयो।
काठमाडौँ महानगरपालिकाले विसं २०७४ देखि मानव सेवा आश्रमसँग सहकार्य गर्दै सडक सहयोगापेक्षी व्यक्तिहरूको उद्धार, संरक्षण र व्यवस्थापनका लागि वार्षिक औसत करिब दुई करोड रुपैयाँ खर्च गर्दै आएको जनाएको छ।
यस अवसरमा मानव सेवा आश्रम र आनी छोइङ डोल्मा फाउन्डेसनद्वारा सञ्चालन गरिएको ‘मेची–महाकाली मानवता अभियान’ को औपचारिक समापनसमेत घोषणा गरिएको थियो। मानव सेवा आश्रमका अध्यक्ष रामजी अधिकारीका अनुसार अभियानअन्तर्गत हालसम्म एक सय ९७ जना सहयोगापेक्षी व्यक्तिको उद्धार तथा व्यवस्थापन गरिएको छ।
आनी छोइङ डोल्मा फाउन्डेसनकी अध्यक्ष आनी छोइङ डोल्माले मानवताको प्रवर्द्धनका लागि भएको यो सम्झौता ऐतिहासिक र महत्वपूर्ण रहेको बताउँदै उक्त दिनलाई आफूले विशेष र पवित्र दिनका रूपमा स्मरण गर्ने उल्लेख गर्नुभयो।
कार्यक्रममा वरिष्ठ मुटुरोग विशेषज्ञ डा. भगवान कोइराला, वरिष्ठ कलाकार मदनकृष्ण श्रेष्ठ, संस्कृतिविद् तथा मानव सेवा आश्रमका संरक्षक डा. गोविन्द टण्डनलगायतले मानवता, सामाजिक उत्तरदायित्व र सहयोगापेक्षी नागरिकहरूको संरक्षणका विषयमा धारणा राख्नुभएको थियो।
सम्झौताका पक्षहरू तथा अन्य सम्बन्धित निकायबीच नियमित समन्वय र अनुगमनका लागि एक समन्वय समिति गठन गरिने जनाइएको छ। समितिले सम्झौताको प्रभावकारी कार्यान्वयन, कार्यक्रम सञ्चालन तथा आवश्यक स्रोत–साधन व्यवस्थापनको काम गर्नेछ।
