गोपालप्रसाद भट्टराई, सन्धिखर्क ।
अखिल (छैठौं) का केन्द्रीय अध्यक्ष सुवास जिसीले सत्ताको उन्मादमा राष्ट्रियता, सार्वभौमसत्ता र राष्ट्रिय हितमाथि आघात पुग्ने गतिविधि नगर्न सरकारलाई चेतावनी दिनुभएको छ ।
राष्ट्रिय जनमोर्चा अर्घाखाँचीले प्रधानमन्त्रीले संसद्मा राष्ट्रिय हित विपरीतको अभिव्यक्ति दिएको र सरकारले जनहित विपरीतका कदम गरेको आरोप लगाउँदै त्यसका विरुद्ध २०८३ जेठ २१ गते बिहीबार सन्धिखर्कमा आयोजना गरेको कोणसभालाई सम्बोधन गर्दै उहाँले यस्तो धारणा व्यक्त गर्नुभएको हो ।
राजमोले सधैँ राष्ट्र, राष्ट्रियता, लोकतन्त्र र जनजीविकाको पक्षमा आवाज उठाउँदै आएको उल्लेख गर्दै अध्यक्ष जिसीले कुनै व्यक्ति, दल वा स्वार्थ समूहसँग प्रतिशोध वा बार्गेनिङका आधारमा राजमोले आन्दोलन नगरेको स्पष्ट पार्नुभयो ।
नेपालको सार्वभौमसत्ता र राष्ट्रिय अखण्डतामाथि खलल पुग्ने अभिव्यक्ति देशकै प्रमुखबाट आउनु दुखद र आपत्तिजनक भएको उहाँको तर्क छ ।
जिसीले इतिहासमा भारत वा अन्य कुनै पनि निकायले नेपालले अर्काको भूमि मिचेको आरोप नलगाएको स्मरण गराउँदै हुँदै नभएको विषय उठाएर देशको स्वाभिमानमा आँच पुर्याउन नहुनेमा जोड दिनुभयो ।
कार्यक्रममा बोल्ने अन्य वक्ताहरूले वर्तमान सरकारले परिवर्तनको नाममा संविधान र जनभावना विपरीतका निर्णय अघि बढाएको आरोप लगाए ।
सुकुम्बासी बस्तीमा डोजर चलाएर विपन्न नागरिकलाई विस्थापित गर्ने, विद्यार्थी सङ्गठनमाथि अंकुश लगाउने तथा जनसरोकारका विषयलाई बेबास्ता गर्ने गतिविधि तत्काल रोक्नुपर्ने उनीहरूको माग छ ।
कोणसभामा राजमो नेता शेरबहादुर बिसी, केन्द्रीय सदस्य तथा भूमिकास्थान नगरपालिकाका नगरप्रमुख झविलाल थापा, केन्द्रीय सल्लाहकार यमलाल पोख्रेल, जिल्ला अध्यक्ष थम्मन केसी, उपाध्यक्ष गोपाल पौडेल, कोषाध्यक्ष गोविन्द बिसी, सचिवालय सदस्यद्वय कमल घिमिरे र भीमलाल आचार्य, अखिल नेपाल महिला सङ्घकी केन्द्रीय उपाध्यक्ष कल्पना पोख्रेल, अखिल नेपाल युवक सङ्घका जिल्ला अध्यक्ष रेशम विक, जातीय समता समाजका जिल्ला अध्यक्ष कृष्णबहादुर सुनारलगायतको सहभागिता रहेको थियो ।
राजमो जिल्ला सचिवालय सदस्य जीवनारायण खनालको सञ्चालनमा सम्पन्न कोणसभाका सहभागीले राष्ट्रिय स्वाधीनता, जनअधिकार र लोकतान्त्रिक मूल्यमान्यताको संरक्षणका लागि एकजुट हुनुपर्नेमा जोड दिएका थिए ।
