काठमाडौँ । राष्ट्रिय सभाका माननीय तुलप्रसाद विश्वकर्मा (राजेश) ले प्रधानमन्त्रीको सीमा सम्बन्धी अभिव्यक्तिको कडा आलोचना गर्नुभएको छ ।
विश्वकर्माले भन्नुभयो– ‘प्रधानमन्त्रीले नेपालले पनि केही स्थानमा भूमि मिचेको भन्ने अभिव्यक्ति राष्ट्रहितविपरीत, आपत्तिजनक र तथ्यहीन छ ।’
उक्त अभिव्यक्तिप्रति राष्ट्रिय जनमोर्चाले तत्काल विरोध जनाएको र प्रधानमन्त्रीलाई यस्तो जानकारी दिने व्यक्तिको पहिचान गर्नुपर्ने विश्वकर्माले जोड दिनुभयो ।
सांसदले सीमा विवादको विषय पुरानो रहेको उल्लेख गर्दै झापादेखि पश्चिमी सीमासम्मका विभिन्न स्थानमा भारतद्वारा नेपाली भूमि अतिक्रमण भएको विश्वकर्माले बताउनु भयो ।
उहाँले लिम्पियाधुरा, कालापानी र लिपुलेक जस्ता क्षेत्रको उदाहरण दिँदै सीमा अतिक्रमण र प्राकृतिक कारणले हुने भूमि उपभोग फरक विषय भएको बताउनु भयो ।
विश्वकर्माले प्रधानमन्त्रीले संसदमा आएर आफ्नो अभिव्यक्ति सच्याउनुपर्ने र गल्ती स्वीकार नगरेसम्म सदनको कार्यवाही अगाडि बढाउन नहुने माग समेत गर्नुभयो ।
