काठमाडौँ । प्रगतिशील लेखक सङ्घले जेठ १७ गतेको प्रधानमन्त्री बालेन्द्र शाहको सीमासम्बन्धी अभिव्यक्तिबाट आम नेपाली जनतासमक्ष गम्भीर जिज्ञासा र चिन्ता उत्पन्न भएको ठहर गरेको छ ।
अध्यक्ष डा. देवी क्षेत्री दुलाल र महसचिव डा. झगिन्द्रराज ढकाल (पारस) को हस्ताक्षरमा २०८३ जेठ १८ गते प्रेसविज्ञप्ति जारी गर्दै प्रलेसले सो धारणा व्यक्त गरेको हो ।
राष्ट्रियता, अखण्डता, सार्वभौमसत्ता तथा स्वतन्त्र परराष्ट्र नीति अन्यन्त संवेदनशील विषय भएको बताउँदै प्रलेसले यस्ता विषयमा प्रधानमन्त्रीजस्तो संस्था जिम्मेवार तथा तथ्यपरक हुनुपर्ने ध्यानाकर्षण गराएको छ ।
विनातथ्य तथा प्रमाण यस खालका अभिव्यक्ति दिइएको भन्दै विज्ञप्तिमा सार्वजनिक रूपमा क्षमायाचना गर्न तथा त्यसद्वारा भएको क्षतिको जिम्मेवारी प्रधानमन्त्रीले नै लिनुपर्ने धारणा प्रलेसले व्यक्त गरेको छ ।
यस्तो छ, प्रेसविज्ञप्तिको पूर्ण पाठ :
“२०८३ जेठ १७ गते सङ्घीय संसद्मा प्रधानमन्त्री बालेन्द्र शाहद्वारा नेपालको सीमासम्बन्धी विषयमा व्यक्त गरिएको अभिव्यक्तितर्फ प्रगतिशील लेखक सङ्घ, नेपालको गम्भीर ध्यानाकर्षण भएको छ । नेपालको राष्ट्रियता, अखण्डता, सार्वभौमसत्ता तथा स्वतन्त्र परराष्ट्र नीतिसँग सम्बन्धित अत्यन्त संवेदनशील विषयमा प्रधानमन्त्रीबाट व्यक्त भनाइले आम नेपाली जनतामाझ गम्भीर जिज्ञासा र चिन्ता उत्पन्न गरेको छ ।
नेपालको विभिन्न भूभागमा विदेशी अतिक्रमण तथा सीमासम्बन्धी विवादका विषय निरन्तर बहसको केन्द्रमा रहेका बेला नेपालले भारतको भूमि कहाँ, कहिले र कति क्षेत्रफल अतिक्रमण गरेको हो भन्ने विषयमा प्रधानमन्त्रीले स्पष्ट तथ्य, प्रमाण र आधार सार्वजनिक गर्नुपर्ने हाम्रो जोडदार माग छ । राष्ट्रको सीमा, राष्ट्रिय स्वाधीनता र सार्वभौमिकताको प्रश्न कुनै सामान्य राजनीतिक टिप्पणी वा बहसको विषय होइन, यो सम्पूर्ण नेपाली जनताको राष्ट्रिय स्वाभिमान, ऐतिहासिक यथार्थ र राष्ट्रिय अस्तित्वसँग प्रत्यक्ष रूपमा जोडिएको विषय हो ।
त्यसैले यस्ता संवेदनशील विषयमा राज्यको कार्यकारी नेतृत्वमा रहेका व्यक्तिबाट गरिने अभिव्यक्ति तथ्यपरक, जिम्मेवार र राष्ट्रहितअनुकूल हुनु आवश्यक छ । यदि प्रधानमन्त्रीले आफ्नो भनाइको पुष्टि गर्ने पर्याप्त तथ्य र प्रमाण प्रस्तुत गर्न सक्नुहुन्न भने उहाँले उक्त अभिव्यक्तिप्रति नेपाली जनतासमक्ष सार्वजनिक रूपमा क्षमायाचना गर्नुपर्छ साथै त्यसबाट राष्ट्रिय भावना र जनमानसमाथि परेको असरप्रति नैतिक जिम्मेवारी पनि वहन गर्नुपर्छ ।
प्रगतिशील लेखक सङ्घ नेपाल राष्ट्रिय स्वाधीनता, सार्वभौमिकता, भौगोलिक अखण्डता तथा जनताको स्वाभिमानको पक्षमा सधैँ दृढतापूर्वक उभिने आफ्नो प्रतिबद्धता पुन: व्यक्त गर्दछ साथै सम्पूर्ण लेखक, बुद्धिजीवी, सांस्कृतिककर्मी तथा सचेत नागरिकलाई राष्ट्रिय हित र स्वाधीनतासँग सम्बन्धित विषयमा सजग, जिम्मेवार र एकताबद्ध रहन हार्दिक आह्वान गर्दछ ।”
