काठमाडौँ । नेकपा (मसाल) का प्रवक्ता रामप्रकाश पुरीले वर्तमान बालेन्द्र सरकारबाट जनताको पक्षमा नयाँ काम केही नहुने ठोकुवा गर्नुभएको छ ।
अन्तर्राष्ट्रिय नेपाली एकता समाजको आयोजनामा २०८३ जेठ १५ गते आयोजित भर्चुअल अन्तरक्रिया कार्यक्रममा विशिष्ट अतिथिको आसनबाट मन्तव्य राख्दै उहाँले सो दाबी गर्नुभएको हो ।
अध्यक्ष शक्तमान बुढाथोकीले ‘संविधान संशोधनको सन्दर्भमा गणतन्त्र र राष्ट्रियता’ विषयक अवधारणापत्र प्रस्तुत गर्नुभएसँगै प्रवक्ता पुरी मन्तव्य राख्दै हुनुहुन्थ्यो ।
उहाँले अहिले सत्तारूढ भएको राष्ट्रिय स्वतन्त्र पार्टीलाई साम्राज्यवादको कठपुतली भएकोसमेत आरोप लगाउनुभयो ।
‘रास्वपा साम्राज्यवादी शक्तिले जन्माएको कठपुतली हो’ प्रवक्ता पुरीले भन्नुभयो– ‘यस्तो कठपुतली सरकारबाट जनताको पक्षमा नयाँ काम केही हुन्न ।’
विद्यार्थी सङ्गठन र टे«ड युनियन खारेजी, प्रेसमाथिको अङ्कुश र सुकुम्वासी बस्ती हटाउ प्रकरणको उदाहरण दिँदै उहाँले सरकारले सामान्य मानवीय संवेदनासमेत कुल्चने गरेको विश्लेषण अगाडि सार्नुभयो ।
उहाँले भन्नुभयो– ‘विश्वभरिका पुँजीवादीहरूले स्वीकार गरेका ट्रेड युनियन अधिकारसमेत नयाँ भनिएकाले खोसिरहेका छन् ।’
सुकुम्वासीलाई पहिला व्यवस्थापन, त्यसपछि मात्र उनीहरूको बस्ती हटाउनुपर्ने सामान्य प्रक्रियाको समेत उनीहरूले बेवास्ता गरिरहेको बताउनुभयो ।
संविधान संशोधनको सन्दर्भमा सरकारको नियत प्रतिगामी रहेको बुझाइ उहाँले व्यक्त गर्नुभयो ।
‘संविधान संशोधन उनीहरूले प्रतिगामी उद्देश्यका लागि गर्न खोजेकोजस्तो देखिन्छ’ उहाँले भन्नुभयो– ‘गणतन्त्र र धर्मनिरपेक्षता तथा राष्ट्रकै अस्तित्व समाप्त गर्नका लागि उनीहरूले संविधान संशोधन गर्न खोजिरहेको देखिन्छ ।’
त्यस्तै उहाँले सस्तो लोकप्रियताको खोजीमा सत्तारूढ शक्तिले देशमा फासिवादको अभ्यास गर्न खोजिरहेको पनि बताउनुभयो ।
कम्युनिस्ट क्रान्तिकारी शक्तिहरू कमजोर भएको अवस्थामा रास्वपाले पपुलिस्ट चिन्तन उपयोग गरिरहेको भनाइ उहाँको थियोा ।
सङ्घीयता खारेजी पनि यो सरकारबाट नहुने उहाँले स्पष्ट पार्नुभयो ।
कार्यक्रममा राष्ट्रिय जनमोर्चाका महासचिव मनोज भट्ट, अखिल नेपाल कानुन व्यवसायी सङ्घ (अन्ला) का अध्यक्ष अधिवक्ता पदम रोकासँगै मूल प्रवाह अखिल भारत नेपाली एकता समाजका महासचिव त्रिभुवन भट्टराई, कतार नेपाली एकता समाजका प्रथम उपाध्यक्ष कमल आचार्य, हङकङ नेपाली एकता समाजका महसचिव अमृता रानाथापा, जापान नेपाली एकता समाजका सचिव प्रदीप विक, साउदी अरब नेपाली एकता समाजका अध्यक्ष खुमिराम भण्डारी र मलेसिया नेपाली एकता समाजका अध्यक्ष केशव खनालले पनि मन्तव्य राख्नुभएको थियो ।
सो अवसरमा राजमो केन्द्रीय सल्लाहकार आनन्द शर्मा, मूल प्रवाहका सल्लाहकार ठाकुर खनाल, अखिल नेपाल प्रगतिशील लेखक सङ्घका अध्यक्ष समीर सिंहलगायतको आतिथ्य रहेको थियो ।
कार्यक्रमको अध्यक्षता उपाध्यक्ष प्रेम पौडेलले, सञ्चालन महासचिव खुम रायमाझीले र स्वागत केन्द्रीय सदस्य रामप्रसाद पराजुलीले गर्नुभएको थियो ।
कार्यक्रमको अन्तमा जनक विसी, कुमार खनाललगायतले पूरक जिज्ञासा राख्नुभएको थियो ।
