काठमाडौँ । राष्ट्रिय जनमोर्चाका महासचिव मनोज भट्टले गणतन्त्र र राष्ट्रियतालाई केन्द्रमा राखेर संविधान संशोधन गरिनुपर्ने आवश्यकतामा जोड दिनुभएको छ ।
अन्तर्राष्ट्रिय नेपाली एकता समाजद्वारा २०८३ जेठ १५ गते अबेर साँझ सम्पन्न भर्चुअल अन्तरक्रियामा प्रमुख अतिथिको आसनबाट मन्तव्य राख्दै उहाँले सो अभिव्यक्ति दिनुभएको हो ।
महसचिव भट्टले भन्नुभयो– ‘संविधान संशोधन गर्दा गणतन्त्र र राष्ट्रियतालाई केन्द्रमा राखिनुपर्दछ ।’
राजमोले वर्तमान परिस्थितिमा लोकतान्त्रिक गणतन्त्र चाहेको स्पष्ट पार्नुभयो ।
‘हामीले चाहेको लोकतान्त्रिक गणतन्त्र हो’ उहाँले अगाडि भन्नुभयो– ‘हामीले धार्मिक गणतन्त्र, सैन्य गणतन्त्र वा सङ्घीय गणतन्त्र चाहेका छैनौँ ।’
तत्कालै नयाँ जनवादी गणतन्त्र स्थापना हुने अवस्था नरहेको स्पष्ट पार्दै उहाँले लोकतान्त्रिक गणतन्त्र नै तात्कालिक राजनीतिको सही दिशा हुने स्पष्ट पार्नुभयो ।
संविधान संशोधनको प्रक्रियाबारे राजमो स्पष्ट रहेको दाबी गर्दैै उहाँले आफ्ना राजनीतिक मुद्दामा बहस होस् भनेर नै संविधान संशोधन कार्यदलमा आफूहरू सक्रिय रहेको बताउनुभयो ।
भट्टले भन्नुभयो– ‘हामीलाई संविधानसभाको प्रकृति र प्रक्रियाबारे जानकारी छ र वर्तमान राजनीतिक दलका चरित्र तथा भूमिकाबारे पनि हामी जानकार छौँ । त्यसका बाबजुद राजमोको मुद्दा छलफलमा जाओस् भनेर नै हामी संविधान संशोधन कार्यदलमा सहभागी भएका छौँ ।’
संविधान संशोधन कार्यदलका सदस्यसमेत रहनुभएका भट्टले सुरुमा कङ्ग्रेस र एमालेका प्रतिनिधि बैठकमा सामेल भएको जानकारी दिँदै पछि आफ्ना प्रतिनिधि फिर्ता लिनुमा उनीहरूको त्यसबारे स्पष्ट दृष्टिकोण नभएकाले त्यसो गरिएको दाबी गर्नुभयो ।
‘कङ्ग्रेस र एमाले संविधान संशोधनका विषयबारे स्पष्ट छैनन् । त्यसैले उनीहरूले कार्यदलमा आफ्ना प्रतिनिधि पठाएका छैनन्’ उहाँले स्पष्ट पार्नुभयो ।
कार्यदल बैठकमा उपस्थिति हुँदाको अनुभूति सुनाउँदै उहाँले अहिले कसैले पनि कार्यकारी राष्ट्रपतिको पक्षमा आफूलाई प्रस्तुत नगरेको बताउनुभयो ।
उहाँले भन्नुभयो– ‘म जति पनि बैठकमा उपस्थित भएँ, त्यसमा कङ्ग्रेस, एमाले र नेकपाका प्रतिनिधिहरू कार्यकारी राष्ट्रपतिको पक्षमा बोलेका छैनन् ।’
कङ्ग्रेस कार्यकारी राष्ट्रपतिको पक्षमा नभएको, एमालेमा त्यसबारे प्रष्ट नभएको र नेकपा अहिले आफै सानो शक्तिमा भएको तथा एकतामा सामेल माधव नेपाल पक्षको त्यसबारे फरक मत भएकाले उनीहरू यस प्रस्तावको पक्षमा नभएको महासचिव भट्टको भनाइ थियो ।
उहाँले भन्नुभयो– ‘मैले त यस्तो प्रारम्भिक प्रतिक्रिया पाएको छु, रास्वपा पनि कार्यकारी राष्ट्रपतिको मुद्दाबाट आफूलाई हटाउँदैछ किनभने अहिले प्रधानमन्त्री बालेन्द्र शाहको भूमिकाबाट उनीहरू स्पष्ट भएका छन् ।’
कार्यक्रममा नेकपा (मसाल) का प्रवक्ता रामप्रकाश पुरी, अखिल नेपाल कानुन व्यवसायी सङ्घ (अन्ला) का अध्यक्ष अधिवक्ता पदम रोकासँगै मूल प्रवाह अखिल भारत नेपाली एकता समाजका महासचिव त्रिभुवन भट्टराई, कतार नेपाली एकता समाजका प्रथम उपाध्यक्ष कमल आचार्य, हङकङ नेपाली एकता समाजका महसचिव अमृता रानाथापा, जापान नेपाली एकता समाजका सचिव प्रदीप विक, साउदी अरब नेपाली एकता समाजका अध्यक्ष खुमिराम भण्डारी र मलेसिया नेपाली एकता समाजका अध्यक्ष केशव खनालले पनि मन्तव्य राख्नुभएको थियो ।
सो अवसरमा राजमो केन्द्रीय सल्लाहकार आनन्द शर्मा, मूल प्रवाहका सल्लाहकार ठाकुर खनाल, अखिल नेपाल प्रगतिशील लेखक सङ्घका अध्यक्ष समीर सिंहलगायतको आतिथ्य रहेको थियो ।
अन्तर्राष्ट्रियका अध्यक्ष शक्तमान बुढाथोकीले ‘संविधान संशोधनको सन्दर्भमा गणतन्त्र र राष्ट्रियता’ विषयक अवधारणापत्र प्रस्तुत गर्नुभएसँगै सुरु भएको कार्यक्रमको अध्यक्षता उपाध्यक्ष प्रेम पौडेलले, सञ्चालन महासचिव खुम रायमाझीले र स्वागत केन्द्रीय सदस्य रामप्रसाद पराजुलीले गर्नुभएको थियो ।
कार्यक्रमको अन्तमा जनक विसी, कुमार खनाललगायतले पूरक जिज्ञासा राख्नुभएको थियो ।
