काठमाडौँ । मूल प्रवाह अखिल भारत नेपाली एकता समाजले गणतन्त्रप्रतिको खतराप्रति आफ्नो सङ्गठन चिन्तित भएको बताएको छ ।
अध्यक्ष प्रेम पौडेलको हस्ताक्षरमा २०८३ जेठ १५ गते शुक्रबार प्रेसवक्तव्य जारी गर्दैै मूल प्रवाहले सो धारणा व्यक्त गरेको हो ।
स्वयम् सरकारकै गतिविधिबाट गणतन्त्र खतरामा पर्न सक्ने उल्लेख गरिएको सो वक्तव्यमा गणतन्त्र पक्षधर शक्तिको मागमा सहकार्य आवश्यकता रहेको औल्याइएको छ ।
यस्तो छ, प्रेसवक्तव्यको पूर्ण पाठ :
“आज जेठ १५ गते गणतन्त्र दिवस हो । यो नेपालमा करिब एक शताब्दी लामो जनताको सङ्घर्ष, त्याग र बलिदानद्वारा प्राप्त महान् ऐतिहासिक उपलब्धि हो । गणतन्त्र दिवसको अवसरमा देश तथा विदेशमा छरिएर रहनुभएका समस्त जनसमुदायमा हाम्रो सङ्गठन हार्दिक शुभकामना व्यक्त गर्दछ । त्यसको साथै नेपालको गणतन्त्र दिवस मनाइरहँदा गणतन्त्रमाथि बढ्दो खतराप्रति चिन्ता व्यक्त गर्दछौँ ।
राजावादी शक्तिसँगै वर्तमान सरकारका गतिविधिबाट पनि गणतन्त्र कमजोर हुने आशङ्का बढेको छ । स्वयम् प्रधानमन्त्रीले सामाजिक सञ्जालमार्फत विभिन्न प्रकारका अभिव्यक्ति दिनु, संसद्मा अनुपस्थित हुनु, संविधान संशोधन कार्यदलमा राजतन्त्र समर्थक व्यक्तिलाई समावेश गरिनुलगायतका कार्यले सरकारको गणतन्त्रको सन्दर्भमा गम्भीर प्रकारको आशङ्का उत्पन्न भएको छ ।
देशमा बढ्दो महँगी, भ्रष्टाचार, कुशासन र बेथिती विरुद्ध जनअसन्तोषका कारण गणतन्त्र वा बहुदलीय व्यवस्थाप्रति जनसमर्थन घट्दै गइरहेको थियो । यसै अवस्थाको फाइदा उठाएर गणतन्त्रको रक्षा गर्न शक्तिशाली जनआन्दोलन आवश्यक बन्न गएको छ । सुशासनको नारा दिएर आएको वर्तमान सरकार पनि फासिवादी प्रवृत्तितर्फ उन्मुख छ ।
गणतन्त्र, राष्ट्रियता र सार्वभौमिकताको रक्षाका लागि सम्पूर्ण लोकतान्त्रिक तथा गणतन्त्र पक्षधर शक्तिबिच व्यापक र दीर्घकालीन सङ्घर्ष आवश्यक छ । गणतन्त्र पक्षधर शक्तिको यस्तो साझा सङ्घर्षप्रति मूल प्रवाह अखिल भारत नेपाली एकता समाजको नैतिक समर्थन रहने पनि हामी स्पष्ट गर्न चाहान्छौँ ।”
