दाङ । राष्ट्रिय जनमोर्चा घोराही नगर समितिको एक प्रतिनिधि मण्डलले घोराही उपमहानगरपालिका प्रमुख नरुलाल चौधरीलाई ज्ञापनपत्र बुझाएको छ । नगर अध्यक्ष मनिराम खनालको नेतृत्वमा गएको प्रतिनिधि मण्डलले सरकारले सुकुम्बासी भूमिहीन नागरिकहरूलाई आतंकित पारेको घट्नाप्रति ध्यानाकर्षण गराएको हो ।
उनीहरूको जीवन रक्षाको लागि कुनै व्यवस्था नगरी अन्धाधुन्द प्रकारले सुकुम्बासी र भूमिहीनहरूका घर टहराहरू भत्काएर यो बर्षातको समयमा अलपत्र पर्ने गरी जुन कार्य सरकारबाट भएको छ, यसलाई तुरुन्त रोकन प्रतिनिधि मण्डलले जोड दिएको छ । भूमिहीन सुकुम्बासीहरूको वैकल्पिक व्यवस्था गरेर मात्र उनीहरूलाई हटाउनु वा स्थानान्तरण गर्नु उपयुक्त हुने प्रतिनिधि मण्डलले माग अगाडि सारेको छ ।
यसप्रकारको गतिविधि बारे स्थानीय सरकारको ध्यान आकर्षित गर्दै राष्ट्रिय जनमोर्चाको प्रतिनिधि मण्डलले ज्ञापन–पत्र बुझाएको हो । प्रतिनिधि मण्डलमा उपाध्यक्ष चन्द्रबहादुर रावत, कोषाध्यक्ष झविलाल कालाथोकी, अखिल नेपाल महिला संघ घोराही नगर अध्यक्ष हेमा पोखरेल, शोभा पोख्रेल, सुशीला नेपाली, कृष्णा राना, शोभाराम आचार्य, पोषण नेपाली, मेघराज भट्टराई, हरि खरेल लगायतको रहनुभएको थियो ।
ज्ञापनपत्र बुझिसकेपछि नगर प्रमुख नरुलाल चौधरीले अहिले देशमा भइरहेको डोजर आतंक बन्द गरी नागरिकको जिउधन र आवासको क्षति हुनेबारे प्रतिनिधि मण्डलले महत्वपूर्ण ध्यानाकर्षण गराएको थियो ।
