काठमाडौं । ‘नेपाल भूमिहीन, सुकुम्बासी तथा अव्यवस्थित बसोबासी संरक्षण समिति’ले सरकारविरुद्ध देशव्यापी आन्दोलनको घोषणा गरेको छ । सोमबार काठमाडौंमा आयोजित पत्रकार सम्मेलनमार्फत समितिले १५ बुँदे माग सार्वजनिक गर्दै माग सम्बोधन नभए सिंहदरबार घेराउदेखि नेपाल बन्दसम्मका संघर्षका कार्यक्रम सञ्चालन गर्ने चेतावनी दिएको हो ।

समितिका संयोजक खगेन्द्र पौडेलले वैकल्पिक पुनर्स्थापना र उचित व्यवस्थापन नगरी भूमिहीन तथा सुकुम्बासीमाथि डोजर चलाइएको आरोप लगाउँदै सरकारको कदम अमानवीय र दमनकारी भएको बताए । उनले सर्वोच्च अदालतको अल्पकालीन आदेशसमेत उल्लंघन गर्दै सरकार ‘डोजर आतंक’ मच्चाउन लागेको आरोप लगाए ।

समितिका सल्लाहकार संयोजक विरेन्द्र विकले वर्तमान सरकार भूमिहीन र विपन्न समुदायप्रति गैरजिम्मेवार बनेको आरोप लगाउँदै सरकारको नीति हुनेखाने वर्गको पक्षमा मात्रै केन्द्रित रहेको टिप्पणी गरे । उनले आन्दोलनलाई चरणबद्ध रूपमा सशक्त बनाउँदै राजधानी केन्द्रित प्रदर्शन, सिंहदरबार घेराउ र नेपाल बन्दसम्म जाने चेतावनी दिए ।

त्यस्तै, समितिले डोजर अभियानका कारण ज्यान गुमाएका पीडितलाई सहिद घोषणा गर्न, पीडित परिवारलाई क्षतिपूर्ति दिन तथा दोषीमाथि कारबाही गर्न माग गरेको छ । भूमिहीन तथा सुकुम्बासीलाई लालपूर्जा, उचित व्यवस्थापन र अवैध डोजर अभियान बन्द गर्नुपर्ने मागसमेत समितिले अघि सारेको छ ।