सुनवल (नवलपरासी) । राष्ट्रिय जनमोर्चा नवलपरासीले “संविधान संशोधनको सन्दर्भमा गणतन्त्र र राष्ट्रियता” विषयक अन्तरक्रिया सम्पन्न गरेको छ ।
अध्यक्ष चित्रबहादुर केसीको प्रमुख आतिथ्यमा २०८३ जेठ १० गते आइतबार सुनवलमा सो कार्यक्रम सम्पन्न भएको हो ।
कार्यक्रममा प्रमुख अतिथि केसीले अवधारणापत्र प्रस्तुत गर्नका साथै उठेका टिप्पणीको बारेमा जबाफ दिनुभएको थियो ।
सो अवसरमा उहाँले नयाँ सरकार आएपछि देशको गणतन्त्र र राष्ट्रियता दुवै खतरामा परेको विचार व्यक्त गर्नुभयो ।
नेपाली जनताले पुराना राजनीतिक दलको अकर्मण्यता र भ्रष्ट भूमिकाको विरुद्धमा नयाँ भनिएका शक्तिलाई पछिल्लो चुनावमा विजय गराए पनि उनीहरू विकल्प बन्न नसकेको उहाँको भनाइ थियो ।
सरकारसित प्रष्ट परराष्ट्र नीति नभएको तथा सुशासनको सन्दर्भमा पनि ठोस खाका नभएको सन्दर्भमा उहाँले सुकुम्वासीमाथिको दमन, टे«ड युनियन तथा विद्यार्थी सङ्गठन खारेजी, प्रेसमाथि नियन्त्रणजस्ता पछिल्ला नीतिको उदाहरण दिनुभयो ।
अध्यक्ष केसीले नयाँ सरकार विरुद्ध पुन: आन्दोलन उठाउनुपर्ने परिस्थिति बन्दै गइरहेको धारणासमेत राख्नुभयो ।
कार्यक्रममा राजमो लुम्बिनी प्रदेश समितिका सदस्य तिलकप्रसाद सुवेदी, नेकपा (मसाल) नवलपरासीका प्रवक्ता रेम राना, नेपाली कङ्ग्रेसका जिल्ला सदस्य बिस्नु पौडेल, नेकपा (एमाले) का जिल्ला सचिव राजन आचार्य, नेपाली कम्युनिस्ट पार्टी केन्द्रीय सदस्य भविश्वर तिवारी, क्रान्तिकारी कम्युनिस्ट पार्टीका केन्द्रीय सदस्य क्षेत्रबहादुर थापा, नेपाल बार एसोसिएसन नवलपरासीका अध्यक्ष रामकृष्ण पौडेल, जिल्ला सहकारी सङ्घका अध्यक्ष विष्णुप्रसाद पौडेललगायतले अवधारणापत्रमाथि टिप्पणीसहित आआफ्ना धारणा व्यक्त गर्नुभएको थियो ।
सहिदको सम्मानमा एक मिनेट मौनधारणसँगै अघि बढेको उक्त कार्यक्रममा स्वागत मन्तव्य राजमो नवलपरासीका सल्लाहकार जितबहादुर पौडेलले, अध्यक्षता जिल्ला अध्यक्ष किसनबहादुर अधिकारीले र सञ्चालन सचिव ढुण्डिराज पोख्रेलले गर्नुभएको थियो ।
