जनकपुरधाम । राष्ट्रिय स्वतन्त्र पार्टी (रास्वपा) बारा जिल्लाको आन्तरिक विवाद सार्वजनिक रूपमा विस्फोट भएको छ । कलैयामा आयोजित विस्तारित जिल्ला बैठक तनावग्रस्त बनेपछि पार्टीका केही प्रतिनिधिसभा सदस्यलाई कार्यकर्ताले बैठकस्थलबाटै लखेटेका छन् भने स्थिति नियन्त्रण बाहिर जान थालेपछि प्रहरीले हस्तक्षेप गरेर उनीहरूको उद्धार गरेको छ ।
शनिबार आयोजित विस्तारित बैठकमा रास्वपाका प्रतिनिधिसभा सदस्यहरू रहबर अन्सारी, अरबिन्द साह, गणेश धिमाल तथा नेता चन्दन सिंह सहभागी भएका थिए । बैठकको सुरुवातमै जिल्ला नेतृत्व, संगठन सञ्चालन र सदस्यता विवादलाई लिएर दुई पक्षबीच चर्काचर्की भएको सहभागीहरूले बताएका छन् ।
कार्यकर्ताहरूका अनुसार सांसदहरूले जिल्ला संगठनमाथि दबाब सिर्जना गर्न खोजेको आरोप लगाइएको थियो । संस्थापक समूहका समर्थकहरूले जिल्ला समितिको निर्णय र संगठनात्मक प्रक्रियामाथि हस्तक्षेप गर्न खोजिएको भन्दै विरोध जनाएका थिए । विवाद बढ्दै जाँदा बैठक हलभित्र नाराबाजी सुरु भएको थियो ।
स्थिति तनावपूर्ण बन्दै गएपछि आक्रोशित कार्यकर्ताले केही सांसद र नेताहरूलाई धक्का दिँदै बैठकस्थल बाहिर निकालेका थिए । प्रत्यक्षदर्शीका अनुसार केही समय बैठक स्थल पूर्ण रूपमा अस्तव्यस्त बनेको थियो । त्यसपछि सुरक्षाका लागि खटिएको प्रहरीले हस्तक्षेप गर्दै सांसदहरूलाई सुरक्षित रूपमा बाहिर निकालेको जनाएको छ ।
रास्वपा बारा जिल्लामा पछिल्ला केही सातादेखि संगठनात्मक विवाद गहिरिँदै गएको छ । केही दिनअघि मात्रै संस्थापक जिल्ला अध्यक्ष चन्दन स्वर्णकारको पार्टी सदस्यता खारेज गरिएको थियो । उक्त निर्णयपछि जिल्ला संगठनभित्र असन्तुष्टि बढेको र त्यसकै प्रभाव विस्तारित बैठकमा देखिएको बताइएको छ ।
पार्टीभित्र संस्थापक पक्ष र वर्तमान नेतृत्वबीच शक्ति संघर्ष चर्किँदै गएको स्थानीय कार्यकर्ताहरूको भनाइ छ । एक पक्षले पार्टीको मूल उद्देश्य र संगठनात्मक मूल्य कमजोर बनाइएको आरोप लगाइरहेको छ भने अर्को पक्षले अनुशासन र संगठन सुदृढीकरणका लागि कदम चालिएको दाबी गरेको छ ।
बैठकमा भएको घटनाले पार्टीभित्रको आन्तरिक असन्तुष्टि सतहमै आएको राजनीतिक विश्लेषकहरूको भनाइ छ । यद्यपि घटनाबारे पार्टीको केन्द्रीय नेतृत्वले औपचारिक धारणा सार्वजनिक गरिसकेको छैन ।
