काठमाडौँ । नेपाल मगर संघको १३औँ राष्ट्रिय महाधिवेशन काठमाडौँमा सुरु भएको छ । “ऐतिहासिक मगराँत सभ्यता र प्राचीन संस्कार–संस्कृतिको जगमा मगराँत दर्शन निर्माण गरौं” भन्ने नारासहित सुरु महाधिवेशन नीति निर्माण, पहिचानको रक्षा र सक्षम नेतृत्व चयनमा केन्द्रित भएको नेताहरूले बताएका छन् ।

महाधिवेशनमा वक्ताहरूले संविधानले सुनिश्चित गरेको समावेशी, समानुपातिक सहभागिता, आदिवासी जनजाति तथा सीमान्तकृत समुदायको अधिकारमाथि हस्तक्षेप हुन खोजिएको भन्दै खबरदारी गरेका छन् । उनीहरूले जनआन्दोलन, जनयुद्ध र गणतान्त्रिक परिवर्तनमा मगर समुदायको ऐतिहासिक योगदान स्मरण गर्दै प्राप्त अधिकार कटौती गर्न खोजिए संघर्षको बाटो रोज्नुपर्ने चेतावनी दिएका छन् ।

प्रमुख अतिथि तथा पूर्व अर्थमन्त्री वर्षमान पुनले मगर समुदायले नेपालको राजनीतिक परिवर्तन, समावेशी राज्य निर्माण र जनअधिकारको आन्दोलनमा निर्णायक भूमिका खेलेको उल्लेख गर्दै महाधिवेशनले स्पष्ट नीति र जनपक्षीय नेतृत्व चयन गर्ने विश्वास व्यक्त गरे ।

आदिवासी जनजाति महासंघका अध्यक्ष निमा लामा हेल्मो लगायत वक्ताहरूले संविधान संशोधनको नाममा समावेशी अधिकार कमजोर पार्ने प्रयास नगर्न सरकारलाई चेतावनी दिएका छन् । उनीहरूले उत्पीडित समुदायको पहिचान, प्रतिनिधित्व र स्वायत्तताको सवाललाई कमजोर पार्न खोजिए संगठित प्रतिरोध हुने बताएका छन् ।

महाधिवेशनमा मगर भाषा, संस्कृति, मौलिक पहिचान, महिला सहभागिता, आर्थिक आत्मनिर्भरता र संघीय अधिकारको संरक्षणलाई मुख्य एजेन्डा बनाइएको छ । विभिन्न जिल्लाबाट आएका कलाकारहरूले कौरा, पुर्ख्यौली, घाँसीलगायत सांस्कृतिक नृत्य प्रस्तुत गर्दै मगर समुदायको सांस्कृतिक एकता प्रदर्शन गरेका छन् ।