काठमाडौँ । अखिल (छैठौं) को आयोजनामा नयाँ पिँढीका लागि दुईदिने प्रशिक्षण कार्यक्रम सुरु भएको छ ।
२०८३ जेठ ९ गते शनिबारदेखि राष्ट्रिय जनमोर्चा केन्द्रीय कार्यालयको सभाकक्षमा सो प्रशिक्षण सुरु भएको हो ।
कार्यक्रमको उद्घाटन नेकपा (मसाल) का प्रवक्ता रामप्रकाश पुरीले गर्नुभएको थियो ।
सो अवसरमा मन्तव्य राख्दै उहाँले कम्युनिस्ट नेता उत्पादन गर्ने उद्देश्यका साथ आजको कार्यक्रम राखिएको बताउनुभयो ।
प्रत्येक विद्यार्थीमा फरक र विशिष्ट क्षमता भएको सन्दर्भ जोड्दै उहाँले यिनै प्रतिभामध्येबाट कम्युनिस्ट नेता पनि उत्पादन हुन सक्ने बताउनुभयो ।
अहिलेको प्रशिक्षणमा प्रारम्भिकदेखि राजनीतिक–वैचारिक विषय प्रस्तुत गरिने उहाँले जानकारी दिनुभयो ।
‘तपाईंहरू आफै आआफ्नो क्षेत्रमा विज्ञ हुनुहुन्छ’ उहाँले भन्नुभयो– ‘यो प्रशिक्षणले तपाईंहरूलाई मार्गनिर्देशन गर्नेछ । त्यस आधारमा तपाईंहरू देशकै नेतृत्व दिन सक्षम हुनुहुनेछ ।’
कार्यक्रममा मन्तव्य राख्दै राजमो केन्द्रीय सल्लाहकार आनन्द शर्माले लामो प्रयत्नपछि यो कार्यक्रम तय गरिएको जानकारी गराउनुभयो ।
देशको शिक्षामा विदेशीहरूले फन्डिङ गरिरहेको स्पष्ट पार्दै उहाँले विद्यार्थी सङ्गठनमाथि प्रतिबन्ध लगाउने तर अमेरिकी दूताबासले युथ काउन्सिल खोलेर राजनीतिक गरिरहेको बताउनुभयो।
प्रस्तुत कार्यक्रमबाट सङ्गठन र विचारबारे प्रारम्भिकदेखि उच्चस्तरीय प्रशिक्षण दिइने र त्यसबाट विद्यार्थीहरू लाभान्वित हुने आशा उहाँले राख्नुभयो ।
केन्द्रीय अध्यक्ष सुवास जिसीको अध्यक्षता तथा कोषाध्यक्ष समष्टि बुढामगरको सञ्चालनमा अघि बढेको उक्त कार्यक्रममा सहभागीलाई उपाध्यक्ष विवेक जिसीले स्वागत गर्नुभएको थियो ।
कार्यक्रममा रक्तिम सांस्कृतिक अभियानका अध्यक्ष गिरीप्रसाद बुढा, प्रगतिशील पत्रकार सङ्घका महासचिव प्रकाश थापामगर, युगदर्शन साप्ताहिकका कार्यकारी सम्पादक धनवीर पुनमगर र अखिल नेपाल युवक सङ्घका केन्द्रीय सदस्य सगर सुवेदीको पनि आतिथ्य रहेको थियो ।
