काठमाडौं । नेपाली कांग्रेस, नेकपा एमाले र नेकपाबिच संविधान र लोकतान्त्रिक गणतन्त्रको रक्षा गर्न सहकार्य गर्ने विषयमा छलफल तीव्र भएको छ । वर्तमान सरकारका गतिविधि संविधान र लोकतान्त्रिक मूल्यविपरीत भएको भन्दै तीन दलका शीर्ष नेताहरूबीच औपचारिक तथा अनौपचारिक संवाद भइरहेको जनाइएको छ ।
एमाले अध्यक्ष केपी शर्मा ओलीले कांग्रेस र नेकपा नेताहरूसँग सहकार्यबारे छलफल भइरहेको जानकारी दिएका छन् । नेताहरूका अनुसार सरकारका गतिविधिविरुद्ध सडक र सदनमा संयुक्त रूपमा अघि बढ्ने विषयमा सैद्धान्तिक सहमति बनेको छ ।
प्रदेश सरकारको नेतृत्व परिवर्तन गरी नेकपालाई सुदूरपश्चिम सरकारको नेतृत्व दिने प्रस्तावसमेत छलफलमा रहेको बताइएको छ । कांग्रेसले भने यस विषयमा अन्तिम निर्णय गरिसकेको छैन ।
कांग्रेस, एमाले र नेकपाले संविधान, लोकतन्त्र र गणतन्त्रको रक्षाका लागि आवश्यक सहकार्य गर्न आफूहरू तयार रहेको बताएका छन् ।
