नवलपुर, जेठ ५ । राष्ट्रिय जनमोर्चा नवलपुरको आयोजनामा संविधान सशोधनको सन्दर्भमा “गणतन्त्र र राष्ट्रियता” विषयक अन्तरक्रिया कार्यक्रम सम्पन्न भएको छ ।
कार्यक्रममा राष्ट्रिय जनमोर्चा जिल्ला अध्यक्ष गिरबहादुर महतराले अध्यक्षता गर्नुभएको थियो भने सञ्चालन जिल्ला सचिव मानबहादुर रानाभाटले गर्नुभएको थियो । कार्यक्रममा राष्ट्रिय जनमोर्चाका केन्द्रीय कार्यवाहक अध्यक्ष रश्मिराज नेपालीको प्रमुख आतिथ्यता रहेको थियो।
त्यसैगरी कार्यक्रममा राष्ट्रिय जनमोर्चाका केन्द्रीय सदस्यहरू भागीरथ भट्टराई र दिपक पाण्डे, नेपाल कम्युनिष्ट पार्टी (मसाल) नवलपुरका प्रवक्ता चन्द्र सापकोटा, नेपाली कांग्रेस जिल्ला सचिव महेन्द्र पोखरेल, नेपाल कम्युनिष्ट पार्टी (एमाले) जिल्ला सचिव भीमलाल कडेल, नेपाल कम्युनिष्ट पार्टी जिल्ला इन्चार्ज धनप्रसाद सापकोटा, नेकपा माओवादीका केन्द्रीय प्रतिनिधि अर्जुन सी लगायत विभिन्न राजनीतिक तथा सामाजिक संघसंस्थाका प्रतिनिधिहरूके उपस्थिति रहेको थियो।
कार्यक्रमको सुरुवातमा एक मिनेट मौनधारण गरिएको थियो । त्यसपछि राष्ट्रिय जनमोर्चा जिल्ला सदस्य होमनाथ पराजुलीले स्वागत मन्तव्य राख्नुभएको थियो ।
प्रमुख अतिथि रश्मिराज नेपालीले समसामयिक राजनीतिक विषय उठाउँदै कार्यपत्र प्रस्तुत गर्न चन्द्र सापकोटालाई अनुमति दिनुभएको थियो । सापकोटाले संविधान संशोधन, गणतन्त्र र राष्ट्रियतासम्बन्धी कार्यपत्र प्रस्तुत गर्नुभएको थियो ।
उक्त कार्यपत्रमाथि निर्मल लामा प्रतिष्ठानका सदस्य किसन गैरे, पुष्पलाल प्रतिष्ठानका धर्म केसी, कावासोती नगरपालिकाका नगर प्रमुख विष्णु भुसाल, नेकपा माओवादीका अर्जुन सी, नेपाल कम्युनिष्ट पार्टीका धनप्रसाद सापकोटा, एमालेका भीमलाल कडेल, नेपाली कांग्रेसका महेन्द्र पोखरेल तथा राष्ट्रिय जनमोर्चाका भागीरथ भट्टराईले आ–आफ्ना धारणा राख्नुभएको थियो।
कार्यक्रमको अन्त्यमा प्रमुख अतिथि नेपालीले उठेका प्रश्नहरूको जवाफ दिँदै कार्यपत्रप्रति अधिकांश सहभागीको धारणा समान रहेको बताउनुभयो । उहाँले गणतन्त्रवादी शक्तिहरू एकजुट हुनुपर्ने आवश्यकता औँल्याउनुभयो ।
अन्तमा अध्यक्ष गिरबहादुर महतराले समापन मन्तव्यसहित कार्यक्रम सम्पन्न भएको घोषणा गर्नुभएको थियो ।
