केरसिंह अदै, तौलिहवा ।
राष्ट्रिय जनमोर्चा कपिलवस्तुको आयोजनामा ‘संविधान संशोधनको सन्दर्भमा गणतन्त्र र राष्ट्रियता’ विषयक अन्तक्र्रिया कार्यक्रम सम्पन्न भएको छ । २०८३ जेठ ४ गते मङ्गलबार ४ नम्बर जितपुरमा सो कार्यक्रम सम्पन्न भएको हो ।
कार्यक्रममा प्रमुख अतिथि राजमो केन्द्रीय सल्लाहकार बद्रे आलम हुनुहुन्थ्यो । उहाँले १५ बुँदामा रहेको अवधारणापत्र प्रस्तुत गर्नुभएको थियो ।
अवधारणापत्रमा संविधान संशोधनको सन्दर्भमा सचेत बन्दै गणतन्त्र र राष्ट्रियताको रक्षा तथा सङ्घीयताको खारेजी राष्ट्रिय आवश्यकता हुन गएको उल्लेख छ । सरकारको अधिनायकवादी चरित्र र मौलिक अधिकार हनन्ले २०७२ सालको संविधानप्रदान हकअधिकार कुठाराघात भएको ठहर गर्दै २०७२ सालको संविधानका पक्षधरको एकता आवश्यक रहेको औल्याइएको छ ।
उक्त अवधारणामाथि आधारित रहेर कार्यक्रममा धारणा राख्नेहरूमा नेकपा (मसाल) कपिलवस्तुका प्रवक्ता माधव भाटक्षेत्री, नेपाली कङ्ग्रेसका नेता हरिप्रसाद पौडेल, नेकपा (एमाले) का जिल्ला सचिवालय सदस्य भेषराज पाण्डे, नेपाल कम्युनिस्ट पार्टीका लुम्बिनी प्रदेश सदस्य नारायण भुसाल, नेकपा (माओवादी) का केन्द्रीय सदस्य सङ्घप्रसाद थारू, क्रान्तिकारी कम्युनिस्ट पार्टीका जिल्ला इन्चार्ज दीपक पौडेल र नागरिक समाजका जिल्ला अध्यक्ष अर्जुन पोखरेलले आआफ्नो धारणा व्यक्त गर्नुभएको थियो ।
वक्ताहरूले गणतन्त्र र राष्ट्रियताको रक्षा तथा सरकारको अधिनायकवादी कदमका बारेमा अवधारणापत्रलाई समर्थन गर्दै सबैलाई एक ठाउँमा जुटाउने प्रयास गरेकोमा राजमोलाई धन्यवाद व्यक्त गर्नुभएको थियो ।
राजमो कपिलवस्तुका अध्यक्ष रामप्रसाद बेल्बासेको अध्यक्षतामा अघि बढेको उक्त कार्यक्रममा अखिल नेपाल किसान महासङ्घ (अप्फा) का केन्द्रीय उपाध्यक्ष शिव पौडेलको पनि आतिथ्य रहेको थियो ।
कार्यक्रमको सञ्चालन शशि सापकोटाले तथा स्वागत मन्तव्य राजमो कपिलवस्तुका सचिव केरसिंह अदैले राख्नुभएको थियो ।
