धनगढी, जेठ ३ । राष्ट्रिय जनमोर्चा सुदूरपश्चिम प्रदेश समितिको आयोजनामा संविधान संशोधनका सन्दर्भमा गणतन्त्र र राष्ट्रियताको विषयमा एकदिने अन्तरक्रिया कार्यक्रम धनगढीस्थित सनलाईट होटलमा सम्पन्न भएको छ। कार्यक्रम सोमबार दिउँसो २ बजे आयोजना गरिएको थियो ।
कार्यक्रमको अध्यक्षता राष्ट्रिय जनमोर्चा सुदूरपश्चिमका उपाध्यक्ष हरिकृष्ण पाण्डेले गर्नुभएको थियो भने सञ्चालन प्रदेश सदस्य डबल बोगटीले गर्नुभएको थियो । कार्यक्रममा प्रदेश सचिव राजाराम चौधरीले स्वागत मन्तव्य राख्नुभएको थियो ।
कार्यक्रममा पार्टीका तर्फबाट केन्द्रीय सदस्य नन्दराज भट्टले अवधारणापत्र प्रस्तुत गर्नुभएको थियो । प्रस्तुत कार्यपत्रमाथि विभिन्न राजनीतिक दलका प्रतिनिधिहरूले टिप्पणी गर्दै उक्त अवधारणापत्रमा कुनै आपत्ति जनाउनुपर्ने अवस्था नरहेको धारणा व्यक्त गरेका थिए ।
अन्तरक्रियामा नेपाल कम्युनिष्ट पार्टी (माओवादी केन्द्र) का स्थायी समिति सदस्य भरत बम ‘सि’, नेपाल कम्युनिष्ट पार्टीका केन्द्रीय सदस्य लक्षिराम आचार्यले प्रजातन्त्रप्रेमी जनता तथा गणतन्त्रवादी शक्तिहरू एकजुट हुनुपर्ने आवश्यकता औँल्याएका थिए ।
कार्यक्रममा विभिन्न राजनीतिक दलका प्रतिनिधि, बुद्धिजीवी तथा जनवर्गीय संगठनका प्रतिनिधिहरूको सहभागिता रहेको आयोजकले जनाएको छ ।
