दाङ । राष्ट्रिय जनमोर्चाका अध्यक्ष चित्रबहादुर केसीले शक्तिराष्ट्रहरूले सधैँजसो नेपालका सत्तारूढ राजनीतिक दललाई खेलाउँदै आइरहेको धारणा व्यक्त गर्नुभएको छ ।
राजमो दाङको आयोजनामा २०८३ वैशाख २९ गते मङ्गलबार घोराहीस्थित पत्रकार महासङ्घको सभाहलमा आयोजित ‘वर्तमान राजनीतिक अवस्था र संविधान संशोधन’ विषयक अन्तरक्रिया कार्यक्रममा प्रमुख अतिथिको आसनबाट मन्तव्य राख्दै उहाँले सो धारणा राख्नुभएको हो ।
केसीले भन्नुभयो– ‘नेपाललाई सधैँ शक्तिराष्ट्रले खेलाइरहने गरेका छन् । पार्टीलाई किनेर, सत्तामा लगेर र दबाब दिएर उनीहरूबाट आफ्नो स्वार्थ पूरा गरिरहने गरेका छन् ।’
उहाँले सोही कारणले नेपाल अहिलेसम्म पनि अर्धऔपनिवेशिक र अर्धसामन्ती देशको रूपमा रहेको स्पष्ट पार्नुभयो ।
‘अहिले प्रत्यक्ष रूपमा अमेरिकाले आफ्नोअनुकूलको सरकार बनाएर उपयोग गरिरहेको छ’ उहाँले भन्नुभयो– ‘त्यसैले अब साम्राज्यवादी खतरा नेपालमा झन् झन् बढ्दै गइरहेको छ ।’
अमेरिकाले नेपालमा प्रत्यक्ष रूपमै घन्टीपार्टी स्थापना गरेर आफ्ना स्वार्थ पूरा गर्ने काम गरेको हुनाले देश अत्यन्तै सङ्कटग्रस्त अवस्थामा पुगेको उहाँको भनाइ थियो ।
केसीले भन्नुभयो– ‘देशलाई जोगाउन जनताले नै पहल गर्नुपर्छ । त्यसको लागि हामी सबै सचेत हुनुपर्छ ।’
संविधान संशोधन प्रश्नमा उहाँले गणतन्त्र र राष्ट्रियताको विषयमा कुनै संशोधन हुन नसक्ने तर सङ्घीयताको खारेजी लागि भने आफ्नो पार्टीले लगातार आवाज उठाउँदै आइरहेको जानकारी दिनुभयो ।
अहिलेको संविधान संशोधन बहसपत्रमा पनि राजमोले सङ्घीयता खारेजीलगायतका विषय उठान गरेको बताउनुभयो ।
सुकुम्बासी बस्तीमा सरकारले चलाएको डोजर आतङ्कको अध्यक्ष केसीले कडा शब्दमा विरोध गर्नुभयो ।
उहाँले छानबिन, प्रमाणीकरण र व्यवस्थापनपछि मात्रै सुकुम्बासी बस्ती हटाउन सकिने विकल्प प्रस्तुत गर्नुभयो ।
कार्यक्रमको अध्यक्षता गरिरहनुभएका राजमो केन्द्रीय सदस्य तथा दाङ जिल्ला अध्यक्ष गणेश आचार्यले पार्टीको तर्फबाट अवधारणापत्र वाचन गर्नुभएको थियो ।
अवधारणापत्रमाथि मन्तव्य राख्दै नेपाली कङ्ग्रेसका गिरिराज सुवेदी, नेकपा (एमाले) का शम्भु गौतम, नेपाली कम्युनिस्ट पार्टीका विश्वराज आचार्य, नेकपा (माओवादी) का सबिन पोखरेल, नेपाल पत्रकार महासङ्घका केन्द्रीय सचिव सबिन प्रियासन, नागरिक समाज दाङका सचिव नारायण श्रेष्ठलगायतले टिप्पणी गर्नुभएको थियो ।
राजमो दाङका उपाध्यक्ष महेश रिजालको स्वागत मन्तव्य राख्नुभएको सो कार्यक्रमको सहजीकरण जिल्ला सचिव बसन्त पौडेलले गर्नुभएको थियो ।
