काठमाडौँ । छ किसान सङ्गठनले जेठको पहिलो हप्ता सुकुम्बासी समस्याबारे अन्तरक्रिया गर्ने भएका छन् ।
२०८३ वैशाख २९ गते मङ्गलबार काठमाडौँमा बसेको उनीहरूको संयुक्त बैठकले सो निर्णय गरेको हो ।
उक्त अन्तरक्रियामा राजनीतिक पार्टीका प्रमुखलाई पनि समावेश गराउने निर्णय उनीहरूको छ ।
अन्तरक्रियापछि उनीहरूले सरकारको फासिवादी नीतिका विरुद्ध पत्रकार सम्मेलन गर्ने तथा छ किसान सङ्गठनसम्बद्ध सुकुम्बासी सङ्गठनमाझ संयुक्त सङ्घर्ष समिति निर्माण गर्ने कार्यक्रम उनीहरूको रहेको छ ।
बैठकबाट सुकुम्बासी सङ्गठनको सङ्घर्षप्रति ऐक्यबद्धता प्रकट गर्दै सो सङ्घर्षमा आफूहरू पनि सहभागी हुने घोषणा गरिएको बताइएको छ ।
बैठकमा अखिल नेपाल किसान महासङ्घ (अन्टुक) का अध्यक्ष भैरवराज रेग्मी, अखिल नेपाल किसान महासङ्घ (क्रान्तिकारी केन्द्र) का अध्यक्ष चित्रबहादुर श्रेष्ठ, अखिल नेपाल किसान महासङ्घका बलदेव चौधरी, क्रान्तिकारी किसान सङ्घका अध्यक्ष सीताराम तामाङ, अखिल नेपाल प्रगतिशील किसान सङ्घका इन्चार्ज भूवन फुयाँल र क्रान्तिकारी किसान महासङ्घका महासचिव धनेश्वर पोखरेललगायतको उपस्थिति रहेको थियो ।
किसान नेता बलदेव चौधरी अध्यक्षतामा अघि बढेको उक्त कार्यक्रममा नेपाली कम्युनिस्ट पार्टीका राजेन्द्र पाण्डे, नेपाल कम्युनिस्ट पार्टी लोकनारायण सुवेदीसँगै छ किसान सङ्गठनसम्बद्ध अन्य नेताहरूको उपस्थिति रहेको थियो ।
