तौलिहवा । राष्ट्रिय जनमोर्चा शिवराज नगर समितिले नगरपालिकालाई तीन महत्त्वपूर्ण सार्वजनिक सरोकारका विषयमा तत्काल पहल गर्न आग्रह गर्दै ध्यानाकर्षणपत्र बुझाएको छ ।
आधारभूत अस्पतालमा ३८ लाख ५६ हजार रुपैयाँको अनियमितता, सुकुम्बासी व्यवस्थापनमा देखिएको अन्यौल र जवाई सिँचाइ आयोजनाको ढिलाइले स्थानीय जनजीवनमा पारेको असरबारे पार्टीले नगरपालिकालाई ध्यानाकर्षण गराएको हो ।
२०८३ वैशाख २८ गते राजमो शिवराजका अध्यक्ष केहरसिंह पुनको नेतृत्वमा पालिका पुगेको सो प्रतिनिधिमण्डलमा राजमो कपिलवस्तुका सचिव केरसिंह अदै, राजमो नेताहरू हिमबहादुर विक, कर्मराज चौधरी, शिवप्रसाद चौधरी, रामबहादुर विक, रामप्रसाद कामी, मोहन विक, ज्ञानबहादुर थापा र होमबहादुर कुँवरसमेतको सहभागिता रहेको थियो ।
नगरप्रमुखलाई सम्बोधन गरिएको सो पत्रमा राजमोले सार्वजनिक संस्थामाथि उठेका प्रश्नको समयमै जबाफ नआउँदा नागरिकमा निराशा र अविश्वास बढेको बताएको छ । त्यस्तै, स्वास्थ्य, भूमि व्यवस्थापन र कृषिजस्ता संवेदनशील विषयमा देखिएको ढिलासुस्तीले नगरपालिकाको कार्यक्षमतामाथि प्रश्न उठेको ठहर गरेको छ ।
अस्पतालको रकम हिनामिनाबारे
पत्रमा शिवराज आधारभूत अस्पतालमा करिब एक महिनाअघि ३८ लाख ५६ हजार रुपैयाँ हिनामिना भएको विषय अझै फर्छ्यौट नभएको उल्लेख छ । सार्वजनिक स्वास्थ्य संस्थाजस्तो संवेदनशील क्षेत्रमा आर्थिक अनियमितताको आरोप लाग्दा पनि सत्य तथ्य बाहिर नआएको भन्दै राजमोले तत्कालै छानबिन गरी दोषीमाथि कारबाही गर्न माग गरेको छ ।
पत्रमा चेकमा मिलेमतो, कीर्ते र आर्थिक दुरुपयोगको आशङ्का व्यक्त गर्दै दोषी प्रमाणित हुने जोसुकैलाई पदमुक्त गरी कानुनी कारबाही गर्नुपर्ने उल्लेख गरिएको छ साथै रकम असुलउपर गर्न अस्पताल व्यवस्थापन समितिलाई पूर्ण सक्रिय बनाउनुपर्ने सुझाव पनि दिइएको छ ।
सुकुम्बासी व्यवस्थापनमा स्पष्ट नीति आवश्यक
राजमोले सुकुम्बासी समस्या दीर्घकालीन र जटिल भएकाले केवल सूचना जारी गरेर वा तत्काल हटाउने शैलीमा समस्या समाधान नहुने बताएको छ । वर्षौंदेखि बसोबास गरिरहेका नागरिकको समस्या संवेदनशील ढङ्गले समाधान गर्नुपर्नेमा जोड दिँदै पार्टीले स्पष्ट नीति, व्यापक छलफल र वैकल्पिक व्यवस्थाको माग गरेको छ ।
पत्रमा नगरपालिकाले विद्यालय, मन्दिर, वडा कार्यालय, प्रहरीचौकी र हाटबजार क्षेत्रका सार्वजनिक जग्गा संरक्षण गर्नुपर्ने आवश्यकता औल्याइएको छ तर यस क्रममा गरिब तथा भूमिहीन नागरिकमाथि अन्याय नहुने गरी नीति बनाउनुपर्नेमा जोड दिइएको छ ।
जवाई सिँचाइ आयोजनाको ढिलाइ
पत्रको तेस्रो बुँदामा शिवराज नगरपालिका वडा नं. ३ र ४ क्षेत्रमा सञ्चालित जवाई सिँचाइ आयोजनाको काम सुस्त गतिमा अघि बढिरहेको उल्लेख छ । खैरिपुरदेखि न्यौपारी, सेमरी र भडेखोर क्षेत्रका किसान यस वर्ष समयमै सिँचाइ सुविधा नपाउने चिन्तामा रहेको राजमोले जनाएको छ ।
ठेकेदारले बाँध तथा गेटसमेत भत्काएर काम अधुरो छाडेकाले वर्षा यामअघि नै आवश्यक मर्मत र निर्माण सम्पन्न गर्न आग्रह गरिएको छ अन्यथा किसानहरू धानरोपाइँको समयमा ठुलो समस्यामा पर्ने चेतावनी दिइएको छ ।
जवाफदेहितामाथि प्रश्न
स्थानीय तहले पारदर्शिता, संवेदनशीलता र उत्तरदायित्वका साथ काम गर्नुपर्ने सन्देश दिँदै राजमोले नगरपालिकालाई यथाशीघ्र ठोस निर्णय र कार्यान्वयनमा उत्रिन आग्रह गरेको छ । स्थानीय नागरिकले पनि अस्पताल, भूमिहीन समस्या र सिँचाइजस्ता विषयमा समयमै समाधानको अपेक्षा गरेका छन् ।
ध्यानाकर्षणपत्र चन्द्रौटाका इलाका प्रशासन कार्यालय र वडा प्रहरी कार्यालयलाई बोधार्थ दिइएको छ ।
ध्यानाकर्षणपत्र बुझ्दै प्रमुख प्रकाशकीय अधिकृत पिताम्बर पाण्डेले यसबाट आफूहरूलाई थप सजग बनाएको र समस्या समाधान गर्न लागिपर्ने प्रतिबद्धता व्यक्त गर्नुभयो ।
इलाका प्रशासन कार्यालयका प्रमुख पुष्कर राणाले ध्यानाकर्षणपत्रले ठोस कुरा उठाएकाले मागप्रति गम्भीर हुने स्वीकार्नुभयो ।
