काठमाडौँ । राष्ट्रियसभामा राष्ट्रिय जनमोर्चाका सांसद राजेश विश्वकर्मा (तुलप्रसाद) ले सरकारले सही मनसायबाट अध्यादेश नल्याएको आरोप लगाउनुभएको छ ।
२०८३ वैशाख २८ गते राष्ट्रियसभामा एक्काइसौँ अधिवेशनको पहिलो बैठकमा दलको तर्फबाट मन्तव्य राख्दै उहाँले सो धारणा राख्नुभएको हो ।
‘हामीले देखेका छौँ, सरकारले आफैले बोलाएको संसद् अधिवेशन स्थगन गरेर आठओटा अध्यादेश ल्याएको छ’ उहाँले भन्नुभयो– ‘सरकारले सही मानसायबाट ती अध्यादेश ल्याएको छैन ।’
छ जनाको संवैधानिक परिषद्मा तीन जनाको बहुमत हुन सक्दैन भन्दै उहाँले संवैधानिक परिषद्सम्बन्धी अध्यादेशको विरोध गर्नुभयो ।
‘छ जनाको संवैधानिक परिषद्मा ३ जनाको कसरी बहुमत हुन सक्छ ?’ उहाँले जिज्ञासा राख्नुभयो– ‘संसारकै लोकतान्त्रिक मान्यताअनुसार बहुमतका लागि ५१ प्रतिशत चाहिन्छ तर तीन जनाले त ५० प्रतिशत मात्रै हुन्छ ।’
सांसद विश्वकर्माले भन्नुभयो– ‘यस्तो अध्यादेशले संविधान र लोकतन्त्रको मर्मलाई कायम राख्न सक्दैन । त्यसैले यो अध्यादेश सरकारले फिर्ता लिनुपर्दछ ।’
त्यसैगरी मन्तव्यको क्रममा उहाँले वर्षाको समयमा सुकुम्बासीलाई बिचल्ली पारेको आरोप पनि लगाउनुभयो ।
उहाँले भन्नुभयो– ‘सुकुम्बासीलाई उचित व्यवस्थापन नगरी बर्खा याममा बेदखल गरियो । यो सरकारको अत्यन्त गलत र निर्दयी क्रियाकलाप हो ।’
उहाँले सरकार यस्तो क्रियाकलापबाट पछि हट्नुपर्ने आवश्यकतामा जोड दिनुभयो ।
त्यस्तै विद्यार्थी सङ्गठन तथा ट्रेड युनियन खारेज गर्ने सरकारको निर्णयको पनि सांसद विश्वकर्माले आलोचना गर्नुभयो ।
‘संसारभरिकै लोकतान्त्रिक परम्पराअनुसार पेसागत हकका लागि आवाज उठाउन पाइन्छ । उनीहरूले त्यस्तो हैसियत राख्छन्’ उहाँले भन्नुभयो– ‘त्यसका विपरीत विद्यार्थी सङ्गठन तथा ट्रेड युनियन खारेज गर्ने सरकारको निर्णय लोकतान्त्रिक व्यवस्था र गणतन्त्रात्मक नेपालको विरुद्ध छ ’
उहाँले सरकारले यो निर्णय तुरुन्त फिर्ता लिन आग्रह गर्नुभयो ।
मन्तव्यको क्रममा उहाँले देशका विभिन्न भागमा दलित समुदायमाथि भइरहेका ज्यादतीको प्रसङ्ग उठाउनुभयो ।
‘अहिले पनि देशैभरि दलित महिला तथा बालबालिकामाथि ज्यादती भइरहेको छ, जबकि हामीले यसको विरुद्धमा लगातार आवाज उठाइरहेका छौँ’ उहाँले भन्नुभयो ।
सुर्खेतकी इनिशा विकको बलात्कारपछि हत्या, सिन्धुलीमा दलित युवकको अन्तरजातीय विवाह गरेकाले प्रहरी हिरासतमै निर्मम हत्या र रोल्पामा कथित उच्च जातिको घरमा प्रवेश गरेकोमा दलित बालकमाथि मरणासन्न कुटपिटको प्रसङ्ग उहाँले मन्तव्य उठाउनुभयो ।
सांसद विश्वकर्माले भन्नुभयो– ‘सरकारले माफी मागे पनि व्यवहारमा दलित उत्पीडन रोकिएको देखिएन ।’
उहाँले दलित समुदायको हक, हित र सुरक्षाका लागि जिम्मेवारपूर्ण कदम चाल्न सरकारसित माग गर्नुभयो ।
मन्तव्यको क्रममा उहाँले सरकार अधिनायकवादी बाटो हिँडेको आरोप लगाउँदै यस्तो चरित्रमा परिवर्तन नआए जनता सडकमा आउने स्थिति उत्पन्न हुने बताउनुभयो ।
उहाँले भन्नुभयो– ‘यदि सरकार अधिनायकवादी बाटोमा हिँडिरह्यो भने त्यसको विरुद्ध जनता सडकमा आउनुपर्ने हुन्छ । हामी चाहान्छौँ, सकभर यस्तो स्थिति नआओस् ।’
