काठमाडौँ । अखिल नेपाल राष्ट्रिय उद्योग व्यापार सङ्घको प्रथम राष्ट्रिय अधिवेशन आगामी चैतमा हुने भएको छ ।
प्युठानको स्वर्गद्वारीमा २०८३ वैशाख २० गते बसेको बैठकले सो निर्णय गरेको हो ।
राष्ट्रिय अधिवेशनपूर्व देशव्यापी सङ्गठन विस्तार गरिने तथा केन्द्रीय र क्षेत्रीय स्तरमा अन्तरक्रिया कार्यक्रम सञ्चालन गरिने वैशाख २३ गते अध्यक्ष ढाकाराम पौडेलद्वारा सार्वजनिक गरिएको प्रेसविज्ञप्तिमा जनाइएको छ ।
यस्तो छ, प्रेसविज्ञप्तिको पूर्ण पाठ :
“अखिल नेपाल राष्ट्रिय व्यापार सङ्घको बैठक प्युठान जिल्लाको स्वर्गद्वारीमा २०८३ वैशाख २० गते बस्यो । बैठकले अहिलेको राजनीतिक स्थितिको मूल्याङ्कन गर्दै यसले उद्योगी–व्यवसायीमाथि पारेको असरबारे गम्भीर छलफल गर्दै विभिन्न निर्णयसमेत गरेको छ ।
यसभन्दा पहिलेको सरकारले संविधानमा समाजवादोन्मुख अर्थप्रणालीको व्यवस्था भएता पनि छद्म रूपमा नवउदारवादी अर्थप्रणाली लागु गर्दै आइरहेको थियो । राष्ट्रिय उत्पादन र बजार प्रणालीमा गम्भीर प्रभाव परेको थियो । राष्ट्रिय उद्योगी–व्यवसायी गम्भीर सङ्कटमा परिरहेका थिए । देशको अर्थतन्त्र सङ्कटमा पर्दै गएपछि रोजगारको चरम अभाव सिर्जना भई श्रमिकहरू विदेशतिर पलायन हुँदै गइरहेका छन् ।
कृषिको औद्योगिक विकास हुनुको सट्टा रेमिट्यान्सको नाममा अर्थप्रणाली चल्दै आइरहेको थियो । यसका विरुद्ध जनता आक्रोशित थिए । जेनजीको नाममा भइरहेको राजनैतिक परिवर्तनले त्यसबाट स्थापित बालेन सरकारको नवउदारवादी अर्थप्रणालीको प्रत्यक्ष प्रवेशले राष्ट्रिय उद्यमीहरू धरासायी पर्ने कुरामा कुनै शङ्का छैन । त्यसैले समाजवादोन्मुख अर्थप्रणाली नेपालको अहिलेको राष्ट्रिय अर्थप्रणाली हो भन्ने निष्कर्ष निकालेको छ र यसका लागि सबै उद्योगी–व्यवसायीलाई एकताबद्ध भई आवाज उठाउन अपिल गर्दछ ।
बैठकले आगामी २०८३ चैतमा प्रथम राष्ट्रिय अधिवेशन गर्ने निर्णय गरेको छ । यसका लागि देशमा सङ्गठन विस्तार गर्ने कार्यक्रम तय गरेको छ । राष्ट्रिय र क्षेत्रीयस्तरमा वर्तमान आर्थिक सङ्कटलाई लिएर अन्तरक्रिया कार्यक्रम गर्ने निर्णय गरेको छ । यस कार्यक्रमको लागि स्थान र मिति सचिवालयले निर्णय गर्नेछ ।
अखिल नेपाल राष्ट्रिय उद्योग व्यापार सङ्घ प्युठान जिल्लाको तर्फबाट कमलप्रसाद पौडेलले सबै सहभागीलाई खादा ओढाएर स्वागत गर्नुभएको थियो । केन्द्रीय विस्तारित बैठकको उद्घाटन सङ्घका संस्थापक अध्यक्ष तथा सल्लाहकार भैरवराज रेग्मीले गर्नुभएको थियो । बैठकको अध्यक्षता केन्द्रीय अध्यक्ष ढाकाराम पौडेलले गर्नुभएको थियो । स्वागत केन्द्र्रीय कोषाध्यक्ष बी.बी. अधिकारीले गर्नुभएको थियो ।
बैठकमा निवर्तमान अध्यक्ष तथा एन.एम.आई.सी. का अध्यक्ष ढुण्डिराज पौडेलले शुभकामना दिनुभएको थियो । बैठकको सञ्चालन महासचिव कृष्णभक्त गिरीले गर्नुभएको थियो । सुरुमा राष्ट्रिय गान र सहिदप्रति श्रद्धाञ्जली अर्पण गर्नुका साथै स्वागत गीत पनि गाइएको थियो ।”
