काठमाडौं । विभिन्न विद्यार्थी संगठनहरूले प्रधानमन्त्री वालेन्द्र शाह (वालेन) को हालैको अभिव्यक्तिप्रति कडा आपत्ति जनाउँदै संयुक्त प्रेस वक्तव्य सार्वजनिक गरेका छन् । वक्तव्यमा प्रधानमन्त्रीको टिप्पणीले विद्यार्थी आन्दोलनको ऐतिहासिक योगदानलाई अपमानित गरेको आरोप लगाइएको छ ।

संयुक्त विद्यार्थी आन्दोलनका तर्फबाट जारी वक्तव्यमा भनिएको छ कि विद्यार्थी आन्दोलन निरंकुश राणा तथा पञ्चायती व्यवस्थाविरुद्ध संघर्ष गर्दै बहुदलीय लोकतान्त्रिक व्यवस्थाको स्थापना गर्न महत्वपूर्ण भूमिका खेलेको थियो। “विद्यार्थीहरूले सडकदेखि संघर्षका विभिन्न मोर्चामा रगत बगाएर लोकतन्त्रको स्थापना गरेका हुन्,” वक्तव्यमा उल्लेख गरिएको छ ।

वक्तव्यमा विद्यार्थी आन्दोलनलाई कहिल्यै पराजित गर्न नसकिएको दाबी गर्दै, इतिहासका विभिन्न कालखण्डमा विद्यार्थीहरूलाई जेल, हिरासत र दमनको सामना गर्नुपरे पनि आन्दोलन निरन्तर अघि बढेको उल्लेख गरिएको छ ।

संगठनहरूले स्वीकार गरेका छन् कि आन्दोलनभित्र केही कमजोरीहरू रहेका छन्, तर ती सुधार गर्न सकिने खालका भएको जनाउँदै त्यसका लागि संवाद र सहकार्य आवश्यक रहेको बताएका छन् । तर, सरकारको पछिल्लो व्यवहारले संवादको वातावरण बिगार्ने काम गरेको उनीहरूको आरोप छ ।

प्रधानमन्त्रीले सामाजिक सञ्जालमार्फत विद्यार्थी संगठनहरूलाई “स्लिपर सेल” जस्ता शब्द प्रयोग गरेर आरोप लगाएको भन्दै संगठनहरूले त्यसलाई गैरजिम्मेवार र आपत्तिजनक भनेका छन् । “विद्यार्थी संगठनहरूलाई अपराधीकरण गर्ने, अपमान गर्ने र इतिहासको मजाक उडाउनु निन्दनीय छ,” वक्तव्यमा भनिएको छ ।

अन्त्यमा, संयुक्त विद्यार्थी संगठनहरूले सरकारलाई विरोधी आवाज दबाउने, नियन्त्रण गर्ने तथा निरंकुश प्रवृत्तितर्फ उन्मुख नहुन चेतावनी दिएका छन् । “फासिवादी सोचलाई विद्यार्थी आन्दोलनले सफल हुन दिने छैन,” वक्तव्यमा उल्लेख छ।

यो संयुक्त वक्तव्य विभिन्न विद्यार्थी संगठनका अध्यक्ष तथा प्रतिनिधिहरूले हस्ताक्षर गरी सार्वजनिक गरेका हुन् ।