गोपाल प्रसाद भट्टराई
बैशाख–१९,अर्घाखाँची । विगत १० बर्षदेखि सन्धिखर्कमा मजदुरी गर्दै आउनुभएका श्रमिक लक्ष्मण जि.सी. सम्मानित हुनुभएको छ । मालारानी–४, खन घर भई १० बर्षअगाडि सन्धिखर्क झरि पल्लेदारीदेखि सवारी चालकको काम गर्दै आउनुभएका जि.सी.लाई शुक्रबार अखिल नेपाल ट्रेड युनियन महासंघ (अन्टुक) अर्घाखाँचीले सम्मान गरेको हो ।
श्रमको सम्मान र पेशामा सन्तुष्टि सहित सन्धिखर्कमा बसेर उल्लेख्य योगदान दिनुभएका श्रमिक जि.सी.लाई १३७औँ अन्तर्राष्ट्रिय मजदुर दिवसको अवसरमा सम्मानपत्र, दोसल्ला र नगद सहित सम्मान गरिएको अन्टुक अर्घाखाँचीले जनाएको छ ।
मजदुर दिवसको अवसरमा श्रमिक सम्मान सहित शुभकामना आदान–प्रदान गर्न आयोजित कार्यक्रममा अन्टुकका केन्द्रीय उपाध्यक्ष गोविन्द वि.सी. र राष्ट्रिय जनमोर्चाका जिल्ला अध्यक्ष थम्मन के.सी.ले बिशेष सम्बोधन गर्नुभएको थियो ।
समाजका सबै वर्ग र श्रमको सम्मान नगर्दासम्म मुलुकको समृद्धि हाँसिल हुन नसक्ने उहाँहरूको तर्क छ । ८ घण्टा काम, ८ घण्टा आराम र ८ घण्टा मनोरन्जनको व्यवस्थालाई श्रमिक आन्दोलनले स्वीकार गरिएको प्रसंग सम्झाउँदै उहाँहरूले १३७ वर्ष सम्मपनि मजदुर र कामको सम्मान अझै पूर्ण रुपमा हुन नसकेको बताउनुभएको छ ।
अन्टुक अर्घाखाँचीका अध्यक्ष इन्द्रमणी भुसालको अध्यक्षता, उपाध्यक्ष उषा बस्नेतको स्वागत मन्तव्य र सचिव तुल्सी गैरेको सञ्चालनमा सम्पन्न कार्यक्रममा राजमोका विभिन्न तहका नेताहरूको आतिथ्यता रहेको थियो ।
