कमल पौडेल, खलङ्गा ।
राष्ट्रिय जनमोर्चाका केन्द्रीय सदस्य नारायण जिसीको प्युठान झिमरुक गब्दीघाटमा दाहसंस्कार गरिएको छ ।
२०८२ फागुन १ गते ललितपुरमा निधन भएका जिसीको फागुन २ गते बिहान दाहसंस्कार गरिएको हो ।
दाहसंस्कारपूर्व राजमो प्युठानका कोषाध्यक्ष तथा झिम्रुक पालिका समितिका अध्यक्ष टिकाबहादुर जिसीले सञ्चालनसँगै जिसीको सङ्क्षिप्त जीवनी प्रस्तुत गर्नुभएको थियो ।
राजमो लुम्बिनी प्रदेश समितिका अध्यक्ष बोमबहादुर खत्रीले पार्टीको झन्डा ओढाउनुका साथै शोकमन्तव्य राख्नुभएको थियो ।
शोकको सो घडीमा राजमोसम्बद्ध तथा अन्य पार्टीका विभिन्न नेताकार्यकर्ताको ठुलो सङ्ख्यामा उपस्थिति रहेको थियो ।
स्मृतिशेष जिसीको ब्रेन ट्युमरको उपचारको क्रममा त्रिवि टिचिङबाट डिस्चार्ज भएपछि ललितपुरस्थित केयर सेन्टरमा निधन भएको थियो ।
उहाँकी जीवनसँगिनी तारा जिसी अखिल नेपाल महिला सङ्घकी केन्द्रीय सचिव हुनुहुन्छ ।
स्मृतिशेष जिसीको श्रद्धाञ्जलीस्वरूप काठमाडौँमा र बुटवलमा श्रद्धाञ्जली सभा सम्पन्न भएसँगै शव प्युठान पुगेपछि दाहसंस्कार गरिएको हो ।
