रुपन्देही । रुपन्देही जिल्ला अदालतले राष्ट्रिय स्वतन्त्र पार्टी (रास्वपा) का सभापति रवि लामिछानेसहित प्रतिवादी रहेको सङ्गठित अपराध र सम्पत्ति शुद्धीकरण मुद्दा तत्काल फिर्ता गर्न अस्वीकार गरेको छ ।
महान्यायाधिवक्ता कार्यालयले प्रतिवादी रविसहितको सङ्गठित अपराध र सम्पत्ति शुद्धीकरणसम्बन्धी अभियोग फिर्ता लिने गरी गरेको निर्णय कार्यान्वयनका लागि परेको निवेदन कार्यान्वयन गर्न अदालतले अस्वीकार गरेको हो ।
अदालतका एक तहसिलदारका अनुसार सर्वोच्च अदालतमा त्यस विषयमा परेको रिटको टुङ्गो लागेपछि मात्र पेस गर्नू भन्ने आदेश भएको छ ।
माघ ६ गते न्यायाधीश श्यामलाल घिमिरेको इजलासले ‘उक्त विषयमा सर्वोच्च अदालतमा परेको रिट विचाराधीन नै रहेको बुझिन आएकाले त्यसको अन्तरिम आदेशको विषयमा अन्तिम टुङ्गो लागेपछि मात्र पेस गर्नू’ भन्ने आदेश दिएको पौडेलले जानकारी दिए ।
महान्यायाधिवक्ता कार्यालयले सहकारी ठगीलाई यथावत् राखी सम्पत्ति शुद्धीकरण र सङ्गठित अपराधको अभियोग फिर्ता गरिपाऊँ भनी जिल्ला सरकारी वकिल कार्यालयले निवेदन पेस गरेकोमा रुपन्देही जिल्ला अदालतले अस्वीकार गरेको हो ।
