काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेको स्वास्थ्यावस्था सामान्य रहेको महाराजगञ्जस्थित त्रिवि शिक्षण अस्पतालले जनाएको छ ।
देब्रे खुट्टामा सङ्क्रमण (सेलुलाइटिस) देखिएपछि उनी मङ्गलबारदेखि अस्पताल भर्ना भई उपचाररत छन् ।
अस्पतालका प्रवक्ता डा गोपाल सेढाईंका अनुसार लामिछानेको स्वास्थ्यावस्था सामान्य रहेको छ । उनको नसाबाट आइभी एन्टिबायोटिकमार्फत उपचार भइरहेको अस्पतालले जनाएको छ ।
माघ ५ गते जनकपुरमा आयोजित कार्यक्रममा सहभागी हुने क्रममा लामिछानेको देब्रे खुट्टामा चोट लागेको थियो । औषधी सेवन गर्दा पनि सञ्चो नभएपछि सङ्क्रमण बढेर सेलुलाइटिस भएपछि अस्पतालमा भर्ना भएको पार्टीका सहप्रवक्ता प्रतिभा रावलले बताए ।
उनका अनुसार चिकित्सकको सल्लाहअनुसार सङ्क्रमण जोखिमयुक्त हुन सक्ने भएकाले केही दिन अस्पतालमै निगरानीसहित उपचार भइरहेको छ ।
सामाजिक सञ्जालमा उनको पूरै खुट्टामा प्लास्टर गरिएको फोटो सार्वजनिक भए पनि अस्पतालले सङ्क्रमित स्थानमा मात्रै पट्टी गरिएको जनाएको छ ।
