घोराही । दाङमा राष्ट्रिय जनमोर्चा घोराहीले मनोज खनालको स्मृतिमा श्रद्धाञ्जली सभा सम्पन्न गरेको छ ।
राजमो घोराही नगर समितिका अध्यक्ष मनिराम खनालका कान्छा छोरा मनोजको स्मृतिमा २०८२ पुस २७ गते आइतबार सो कार्यक्रम सम्पन्न भएको हो ।
स्मृतिशेष मनोजका बुबा मनिराम खनालको अध्यक्षतामा अघि बढेको सो सभाको सञ्चालन झबिन्द्र खनालले गर्नुभएको थियो ।
शोकसभामा राजमो केन्द्रीय सदस्य तथा दाङ जिल्ला अध्यक्ष गणेश आचार्य, अखिल नेपाल प्रगतिशील लेखक सङ्घ (अन्पा) लुम्बिनीका उपाध्यक्ष सुरेशकुमार पाण्डे, वडा नं. १७ का वडाध्यक्ष रामलौटन चौधरी, अखिल नेपाल युवक सङ्घका पूर्वकेन्द्रीय अध्यक्ष काशीनाथ पोखरेल, अखिल नेपाल कानुन व्यवसायी सङ्घका केन्द्रीय उपाध्यक्ष तथा दाङ जिल्ला बार एकाइका उपाध्यक्ष नुमानन्द आचार्य, अखिल नेपाल शिक्षक सङ्घका पूर्व जिल्ला सल्लाहकार भीमप्रसाद बेलबासे र पण्डित दामोदर सुवेदीले शोक मन्तव्य राख्नुभएको थियो ।
कार्यक्रममा राजमो केन्द्रीय सदस्य कमला जिसी, अखिल नेपाल जनजाति सम्मेलनका केन्द्रीय सचिव रामबहादुर जिएम, शिक्षक सङ्घका केन्द्रीय सदस्य उमकला खनाल, अखिल नेपाल किसान महासङ्घ (अप्फा) का लुम्बिनी प्रदेश सदस्य खिमानन्द खनाल, राजमो दाङका सहसचिव कृष्णा राना, जिल्ला सदस्य मेघराज भट्टराई, कानुन व्यवसायी सङ्घ दाङका अध्यक्ष उत्तम भण्डारी, अखिल नेपाल महिला सङ्घकी जिल्ला सदस्य हीरा खनाल, नेकपा (एमाले) दाङका दीनमणि आचार्य र जनप्रिय टोल विकास संस्थाका अध्यक्ष विष्णु जिसीसँगै परिवारका सदस्यको उपस्थिति रहेको थियो ।
२०५९ मङ्सिर २१ गते जन्मनुभएका मनोजको गत २०८२ पुस १५ गते सडक दुर्घटनामा निधन भएको थियो ।
