काठमाडौँ । प्रगतिशील पत्रकार सङ्घको उन्नाइसौँ स्थापना दिवस सम्पन्न भएको छ ।
राष्ट्रिय जनमोर्चाका महासचिव मनोज भट्टको प्रमुख आतिथ्यमा २०८२ पुस २२ गते मङ्गलबार राजधानीको रामशाहपथमा सो कार्यक्रम सम्पन्न भएको हो ।
कार्यक्रममा मन्तव्य राख्दै प्रमुख अतिथि भट्टले वर्तमान सरकार निर्दलीय नरहेको दाबी गर्नुभयो ।
‘अहिलेको तीनओटा मन्त्री बब्लु गुप्ता, जगदीश खरेल र कुलमान घिसिङ राष्ट्रिय स्वतन्त्रता पार्टीसित सम्बन्धित छन्’ उहाँले प्रश्न गर्नुभयो– ‘यस आधारमा पनि यो सरकारलाई निर्दलीय वा स्वतन्त्र भन्न मिल्छ ?’
महासचिव भट्टले यो सरकारको चरित्र जस्तोसुकै भए पनि फागुन २१ गते चुनाव हुनुपर्ने धारणा राख्नुभयो ।
‘फागुन २१ गते निर्वाचन हुनुपर्दछ किनकि त्यसबाट देशले एउटा संवैधानिक कोर्स निर्धारण गर्नेछ’ उहाँले सो मितिमा चुनाव नभए देश भड्खालोमा जाने चेतावनी पनि दिनुभयो ।
कार्यक्रमको पूर्वाद्र्धमा अध्यक्ष श्यामलाल पोखरेलले ‘जेनजी र प्रेस स्वतन्त्रता’ विषयक अवधारणा प्रस्तुत गर्नुभएको थियो ।
कार्यक्रममा अवधारणापत्र तथा स्थापना दिवसमाथि केन्द्रित रहेर नेपाल पत्रकार महासङ्घकी केन्द्रीय उपाध्यक्ष नीतु पण्डित, प्रेस चौतारीका अध्यक्ष गणेश पाण्डे, जनपत्रकार सङ्घका अध्यक्ष शेरबहादुर विक, क्रान्तिकारी प्रेस सङ्गठनका उपाध्यक्ष नारायण पङ्गेनी, प्रेस सेन्टरका महासचिव मनोज घर्तीमगर, संविधानसभा सदस्य विनोद पहाडी, पत्रकार महासङ्घका केन्द्रीय सदस्य सूर्य सुवेदी र पत्रकार महासङ्घ काठमाडौँकी अध्यक्ष शोभा अर्यालले पनि मन्तव्य राख्नुभएको थियो ।
सो अवसरमा पत्रकार महासङ्घका नयाँ कार्यसमिति सम्मिलित संयुक्त फोटो फ्रेम अध्यक्ष पोखरेलले उपाध्यक्ष पण्डितलाई हस्तान्तरण गर्नुभएको थियो ।
प्रगतिशीलका अध्यक्ष श्यामलाल पोखरेलको अध्यक्षता तथा महासचिव प्रकाश थापामगरको सञ्चालनमा अघि बढेको उक्त कार्यक्रममा उपस्थित सहभागीलाई केन्द्रीय सदस्य रमेश पौडेलले स्वागत गर्नुभएको थियो ।
कार्यक्रममा पत्रकार महासङ्घका कोषाध्यक्ष रामकृष्ण अधिकारी, पत्रकार महासङ्घ काठमाडौँका सहसचिव विक्रम रत्न, राष्ट्रिय जनमोर्चाका केन्द्रीय सदस्य तथा मसालसम्बद्ध जनवर्गीय सङ्गठनका केन्द्रीय नेता तथा कार्यकर्ताहरूको ठुलो सङ्ख्यामा उपस्थिति रहेको थियो ।
