यूएई । युनाइटेड अरब ईमेरेटस दुबईको शारजाहमा गीता घर्ती नाम गरेकी नेपाली महिलाको कोखबाट जन्मिएकी बालिका यतिबेला देशविहीन हुने अवस्थाबाट मुक्त हुनेभएकी छिन् । रोजा (नाम परिवर्तन) नाम गरेकी चार वर्षकी बालिका हुन् ।

उपनियोग प्रमुख रन्जिता दाहालले युगदर्शनलाई दिनुभएको जानकारी अनुसार गुल्मीकी गीता घर्ती मगरको नोभेम्बर २८, २०२५ मा हृदयघातका कारण मृत्यु भएको थियो । चार वर्षअघि गीताले रोजालाई जन्म दिँदा नै रोजाका पिता गायब भइसकेको बताइएको छ । गिताको मृत्यु भएपछि छोरी बेसहारा भएको खबर नेपाली दूतावासलाई दुबईलाई भएको थियो ।

वाणिज्य दूतावासको पहलमा उक्त बेसहारा बालिकालाई सकेसम्म चाँडो नेपाल फिर्ता पठाउन खोजिरहेको उपनियोग प्रमुख दाहालले बताउनु भयो । दाहालको अनुसार गीता घर्ती मगरको (पासपोर्ट नम्बर PA1381113; EID No.784-1987-7636390-9) रहेको छ ।

यस प्रक्रियालाई सहज बनाउन, वाणिज्य दूतावासले नेपाली नागरिक सुश्री रुमा अधिकारी (इमिरेट्स आईडीः ७८४–१९८०–०४१३२९७–७) लाई युएईका सम्बन्धित अधिकारीहरू समक्ष आफ्‌नो तर्फबाट काम गर्न र सबै आवश्यक कागजातहरू प्राप्त गर्न औपचारिक रूपमा जिम्मा दिएको नेपाल महावाणिज्य दूतावास दुबई, संयुक्त अरब इमिरेट्सका वाइस कन्सुलर प्रदीप सागर गिरीले जारी गरेको परिपत्रमा उल्लेख छ ।