काठमाडौँ । राष्ट्रिय जनमोर्चाका अध्यक्ष चित्रबहादुर केसीले नेपालमा अमेरिकी चलखेल तीव्र भएको बताउँदै नेपालबाट चिनियाँ दूताबास हटाउन अमेरिका लागिपरेको बताउनुभएको छ ।

अन्तर्राष्ट्रिय नेपाली एकता समाजद्वारा २०८२ मङ्सिर १९ गते अबेर राति सम्पन्न भर्चुअल प्रशिक्षण कार्यक्रममा मन्तव्य राख्दै उहाँले यस्तो अभिव्यक्ति दिनुभएको हो ।

अमेरिकाले जेनजी आन्दोलन सञ्चालन गरेको बताउँदै उहाँले नेपालमा चिनियाँ गतिविधि उसलाई पटक्कै मन नपरेको बताउनुभयो ।
उहाँले भन्नुभयो– ‘नेपालबाट चिनियाँ राजदूताबास हटाउने षड्यन्त्र भइरहेको छ ।’

नेपालमा पुराना राजनीतिक पार्टीले पनि भारतीय र अमेरिकी एजेन्डा बोक्ने गरेको, त्यस क्रममा एमसिसी पास गरेको तर त्यतिले मात्र नपुगेर सिधै अमेरिकी हितमा काम गर्ने पार्टीको खोजी नेपाली राजनीतिमा भइरहेको उहाँको भनाइ थियो ।

‘जेनजी आन्दोलनले उठाएका दुईओटा माग जायज थिए तर त्यो आन्दोलनलाई अमेरिकाले हाइज्याक गर्‍यो’ उहाँले भन्नुभयो– ‘त्यो आन्दोलनका लागि अमेरिकाले ४७ करोड खर्च गरेको मिडियामा आएकै छ । जेनजी आन्दोलन उठाउन तालिम दिने काम पनि गरियो ।’
यी सबै काम अमेरिकी जासुसी संस्था सिआइएले गरेको र पछिल्लो समयमा भारतीय जासुसी संस्था रअ पछि परेको खुलासासमेत उहाँले गर्नुभयो ।

‘हामीले जानकारी पाएका छौँ, सिआइएकी एक जना अफिसरले भनेकी छिन्, अहिलेसम्म हामीले ४५ ओटा देशका सरकार पल्टायौँ । यसले गर्दा हाम्रो बदनामी भयो । अब यसबारे विचार गर्नुपर्छ’ उहाँले भन्नुभयो– ‘यता रअका मानिसहरू भनिरहेका छन्, अहिलेसम्म नेपालको राजनीतिक उथलपुथलमा हाम्रै नियन्त्रण हुने गर्दथ्यो, अहिले त सिआइएले हामीलाई हेरेकोहेर्‍यै बनाइदियो ।’

पछिल्लो समयमा मुख्यत: चीन विरोधी स्वार्थलाई केन्द्रविन्दुमा राखेर अमेरिकाले नेपालमा घनीभूत गतिविधि गरिरहेको उहाँको भनाइ थियो ।
अमेरिकाले श्रीलङ्का र बङ्गलादेशमा सरकार पल्टाइसकेपछि नेपालमा सरकार पल्टाएको उहाँको ठहर थियो ।

मन्तव्यको क्रममा उहाँले जेनजी आन्दोलनसँगै दलाई लामाको बधाईले अमेरिकी कनेक्सन पुष्टि भएको बताउनुभयो ।

‘जेनजी आन्दोलनमा तिब्बत ओरिजिनल ब्लड समूह सामेल भएको तपाईंहामी सबैलाई थाहा छ’ उहाँले भन्नुभयो– ‘अब दलाई लामासँगै भागेर नेपाल आइपुगेका तिब्बती शरणार्थीलाई नेपालको नागरिकता दिनुपर्ने माग गरिएको छ ।’

अध्यक्ष केसीले जेनजी आन्दोलनको नाममा चीनका विरुद्ध तिब्बत मामिला उपयोग गर्न अमेरिका लागिपरेको जिकिर गर्नुभयो ।

आगामी चुनावमा अमेरिकी पक्षधर शक्ति बहुमतमा ल्याउन अमेरिकाले राष्ट्रिय स्वतन्त्र पार्टी वा त्यस्तै विकल्पमा काम गरिरहेको पनि बताउनुभयो ।

जेनजी आन्दोलनले भ्रष्टाचार विरुद्धको विषय उठाएकोमा आफूहरूले समर्थन गरेको तर त्यो आन्दोलन भड्किएको प्रमाणस्वरूप उहाँले राजमोका कार्यालयमाथिको आक्रमणलाई लिनुभयो ।

‘जेनजी आन्दोलन भ्रष्टाचार विरुद्धमा थियो तर भ्रष्टाचार गरेरै अकुत सम्पत्ति कमाएका राष्ट्रिय प्रजातन्त्र पार्टी, सहकारी ठगीमा मुछिएका रास्वपाका नेताका घर जलाइएनन् बरु भ्रष्टाचारबाट अछुतो रहेको राजमोका कार्यालय जलाइयो’ उहाँले भन्नुभयो– ‘अमेरिकी साम्राज्यवादको निरन्तर विरोध गरेका कारण हाम्रा बुटवल, अर्घाखाँची, प्युठान र सुर्खेतका कार्यालय आगजनी गरिए ।’

नेकपा (मसाल) का महामन्त्री मोहनविक्रम सिंहले समेत प्रशिक्षण दिनुभएको सो कार्यक्रममा राजमो केन्द्रीय सल्लाहकार आनन्द शर्माको पनि आतिथ्य रहेको थियो ।

अन्तर्राष्ट्रियका अध्यक्ष शक्तमान बुढाथोकीको अध्यक्षता तथा महासचिव खुम रायमाझीको सञ्चालनमा अघि बढेको सो कार्यक्रमको अन्तमा शक्तमान बुढाथोकी, यमनारायण सापकोटा, धनराज शर्मा, कुलबहादुर बगाले, प्रेम आचार्य र नवीन बस्याले पूरक जिज्ञासा राख्नुभएको थियो ।