पोखरा । नेपाली कम्युनिस्ट पार्टी (नेकपा) का संयोजक पुष्पकमल दाहालले सुशीला कार्कीलाई प्रधानमन्त्री बनाउने सहमति आफूहरूले गरेको दाबी गरेका छन् ।
२०८२ मङ्सिर १४ गते आइतबार पोखरामा आयोजित एकता सन्देश सभामा उनले यस्तो दाबी गरेका हुन् ।
कार्यक्रममा पूर्वप्रधानमन्त्री दाहालले भदौ २६ गते राति आफू र माधव नेपालसहितले सहमति गरेर सुशीला कार्कीलाई प्रधानमन्त्री बनाउने सहमति भएको बताएका हुन् ।
‘अहिलेका सम्माननीय प्रधानमन्त्री सुशीला कार्कीलाई प्रधानमन्त्री बनाउने कुराको सहमति हामीले गरेको हो । यो कुराको हेक्का सरकारले राख्न जरुरी छ’ उनले भने ।
मन्तव्यको क्रममा उनले देशैभरि चुनावी वातावरण बनाउनका लागि यो अभियान चलाइरहेको बताए ।
त्यस्तै उनले छिमेकीले समेत आगामी फागुन २१ गते प्रतिनिधिसभाको निर्वाचन चाहेकाले त्यो भएरै छाड्ने ठोकुवासमेत गरे ।
‘कोही पनि द्धिविधामा बस्न जरुरी छैन, चुनाव फागुन २१ गते हुन्छ र हुनुपर्छ’ उनले भने– ‘हाम्रा छिमेकीहरू पनि चुनाव होस् भन्ने चाहन्छन् । सरकार वार्ता बसिरहेको छ, चुनावका लागि ।’
उनले चुनावको वातावरण बनाउन सरकारसँग आग्रह गरे ।
