काठमाडौँ । जहाज उडानकै क्रममा फोटोग्राफी गरेपछि दुई जना पाइलट कारबाहीमा परेका छन् ।
उडान सञ्चालनसम्बन्धी नियम उल्लङ्घन गरेको आरोपमा नेपाल नागरिक उड्डयन प्राधिकरण (क्यान) ले सो कारबाही गरेको हो ।
क्यानले २०८२ मङ्सिर १२ गते शुक्रबार नेपाल वायुसेवा निगमलाई लिखित पत्राचार गर्दै वाइडबडी जहाजका क्याप्टेन विजय लामा र क्याप्टेन सोनी राणालाई उडानमा रोक लगाउन निर्देशन दिएको छ । यससँगै उनीहरूले उडाएका दुई जहाज ग्राउन्डेड भएका छन् ।
प्राधिकरणले दिएको निर्देशनअनुसार उडानमा रहेको अवस्थामा फोटो वा भिडियो खिच्नु उड्डयन सुरक्षा मापदण्ड विपरीत हुन्छ । सोही आधारमा दुवै पाइलटलाई ‘अर्को सूचना नआएसम्म’ का लागि रोस्टर–अफ (उडान तालिकाबाट हटाइएको) गरिएको हो ।
उडान सुरक्षा संवेदनशील विषय भएकाले विमान ककपिटमा विशेषगरी फोटो/भिडियोग्राफीजस्ता क्रियाकलापले सुरक्षा जोखिम बढ्ने मानिन्छ ।
निर्देशनपत्रमा दुबै पाइलटका क्रियाकलाप प्रचलित उड्डयन सुरक्षा नियमसँग बाझिने प्रकारका रहेको स्पष्ट उल्लेख छ ।
लामा सामाजिक सञ्जाल तथा युट्युबमा पनि सक्रिय छन् । क्याप्टेन लामा यसअघि पनि कारबाहीमा परेका थिए ।
