गोपालप्रसाद भट्टराई, सन्धिखर्क ।
सन्धिखर्क साना सहरी खानेपानी तथा सरसफाइ उपभोक्ता मूल संस्थाको छैटौँ अधिवेशनबाट अध्यक्षमा बाबुराम भुसालसँगै राष्ट्रिय जनमोर्चा समर्थित गोपाल पौडेल (जीवलाल) सचिवमा, कल्पना पोख्रेल सहसचिवमा र कमल ढकाल लेखा समिति सदस्यमा चयन हुनुभएको छ ।
२०८२ मङ्सिर ३ गते बुधबार सम्पन्न मतदानमा राजमोको तर्फबाट सचिव पदका प्रत्यासी पौडेलले चार सय ७४ मत र सहसचिव पदका प्रत्यासी पोख्रेलले चार सय ६१ मत प्राप्त गरेर विजयी हुनुभएको थियो ।
नयाँ नेतृत्व चयनका लागि जिल्लामा क्रियाशील राजमो, नेपाली कङ्ग्रेस, नेकपा (एमाले) र नेकपाको समर्थनमा एउटा प्यानल र रास्वपा, स्वतन्त्र नागिरक समाज अर्घाखाँची र जेनजी युवासहित स्वतन्त्र समूहरुको समर्थनमा अर्को प्यानल चुनावी मैदानमा उत्रिएका थिए ।
अध्यक्ष भुसालसहित, वरिष्ठ उपाध्यक्ष वेदराज घिमिरे र कोषाध्यक्ष सरिता महत रास्वपासहितको समर्थनमा रहेको प्यानलबाट निर्वाचित हुनुभएको हो । अन्य उपाध्यक्ष, सचिव, सहसचिव, लेखा समिति संयोजकसहित सबै सदस्य भने चार दलको समर्थनमा बनेको प्यानलबाट विजयी हुनुभएको छ ।
चार दलको समर्थनमा अध्यक्षको उम्मेदवार बन्नुभएका युवराज खत्रीलाई एक सय २० मतले पराजित गरी भुसाल अध्यक्षमा विजयी हुनुभयोे । भुसालले पाँच सय ६३ र खत्रीले चार सय ४३ मत ल्याए ।
एक हजार सात सय ३१ उपभोक्तामध्ये बुधबार भएको मतदानमा एक हजार ६८ मत खसेको थियो । उपाध्यक्षमा चारदलीय गठबन्धनबाट भेषबहादुर केसी, सचिव जीवलाल पौडेल (गोपाल) र सहसचिवमा कल्पना पोख्रेल विजयी हुनुभएको छ ।
सदस्यमा पनि चारदलीय गठबन्धनकै उम्मेदवार नवीन सुनार, मोतिलाल खनाल, कमला अर्याल विजयी हुनुभएको छ ।
त्यस्तै लेखा समिति संयोजकमा चारदलीय गठबन्धनकै सुनिता बेल्वासे विजयी हुनुभयो । लेखा समिति सदस्यमा पनि चारदलीय गठबन्धनकै कमल ढकाल र ज्ञानबहादुर विक विजयी हुनुभएको छ ।
सो संस्थाबाट अर्घाखाँचीको सदरमुकाम सन्धिखर्कस्थित बजार एरिया, चुत्राबेसीलगायतका ठाउँमा पिउने पानी वितरण हुँदै आएको छ ।
