धुलिखेल । गत कात्तिक २१ गते सुरक्षण मुद्रण केन्द्रबाट सवारी चालक अनुमतिपत्र (लाइसेन्स) छपाइ सुरु भएकोमा दुई साता बितिसक्दा पनि काम सुरु भएको छैन । सञ्चार तथा सूचना प्रविधिमन्त्री जगदीश खरेलले छपाइ कार्यको उद्घाटन गरेका थिए ।
दैनिक पाँच सय लाइसेन्स छाप्ने भनेर भनिए पनि त्यसयता लाइसेन्स छपाइ भएको छैन । पहिलो चरणमा अत्यावश्यकसहित १२ लाख लाइसेन्स छपाइ गर्ने सहमति भए पनि उद्घाटनका दिन छापिएको पाँच सयबाहेक हालसम्म लाइसेन्सको छपाइ नभएको सुरक्षण मुद्रण केन्द्रले जनाएको छ ।
यता केन्द्रका कार्यकारी निर्देशक देवराज ढुङ्गानाले भने शुक्रबारदेखि लाइसेन्स छाप्ने काम सुरु हुने दाबी गरे । यातायात विभागबाट डाटा लिन समस्या भएको कारण केही दिन ढिला भएको र बुधबार मात्र यातायात विभागले थप डाटा पठाएको उनको भनाइ छ ।
यातायात विभागको सिस्टम डाउन भएका कारणले डाटा लिनलाई केही समस्या देखिएको, बुधबारबाट समस्या समाधान भएर डाटा प्राप्त भएकाले शुक्रबारबाट पुन: छपाइ सुरु हुने उनले बताए ।
पहिलो चरणमा केही समस्या देखिएकाले दोस्रो चरणदेखि नियमित छपाइ सुरु हुने पनि उनले दाबी गरे ।
मुद्रण केन्द्रले क्वालिटी परीक्षणको लागि पाँच सय लाइसेन्स छापेर केही नमुना काठमाडौँ विश्वविद्यालयको प्रयोगशालामा पठाएको छ तर विश्वविद्यालयले लाइसेन्स परीक्षणको आधिकारिक जानकारी नआएको बताएको छ ।
विश्वविद्यालयमा गत २४ कात्तिकमा इमेलमार्फत एउटा पत्र गए पनि आधिकारिक रूपमा लाइसेन्स टेस्टका लागि हार्डकपीमा पत्र नआएको कारण टेस्टिङको काम सुरु नभएको बताइएको छ ।
प्रयोगशालामा लाइसेन्स कार्ड तन्किने नतन्किने, भाँच्चिने नभाच्चिने, मेटिने नमेटिने, तापक्रम थेग्ने नथेग्ने, कति वर्षसम्म टिक्छ भन्नेलगायतका टेस्ट हुनेछ ।
लाइसेन्स छाप्ने विषयमा अघिल्लो सरकारको पालामै २०८२ वैशाख ३ गते काठमाडौँ विश्वविद्यालयलाई लाइसेन्स छपाइको विषयमा सहजीकरण गर्न पत्र पठाएको थियो ।
केन्द्रका अनुसार पहिलेभन्दा लाइसेन्सको बनावट फरक हुने भएको छ । पहिलेको लाइसेन्समा चिप्स (सिमकार्ड) हुने थियो भने अब छापिने लाइसेन्समा क्युआर कोड हुनेछ ।
केन्द्रले कार्डको ग्यारेन्टी १० वर्षको राखेको छ । त्यसमा नवीकरण गर्ने समय पाँच वर्षको थपेर १५ वर्षका लागि प्रस्ताव भए पनि अहिले १० वर्षको मात्र छ ।
