काठमाडौँ । अमेरिकाले चिनियाँ मूलका वैज्ञानिकको भरमा चीनलाई नै टक्कर दिने लक्ष्य राखेको छ ।
मेटाका सिइओ मार्क जुकरबर्गले जुन महिनामा घोषणा गरेको ‘सुपर इन्टेलिजेन्स ल्याब’ का ११ मध्ये सात जना वैज्ञानिक चिनियाँ मूलका हुन् ।
न्युयोर्क टाइम्सका अनुसार यी सबै ११ वैज्ञानिक अन्य देशमा पढेका आप्रवासी हुन् । यीमध्ये सात जना वैज्ञानिक चीनका हुन् भने बाँकी चार जना भारत, बेलायत, दक्षिण अफ्रिका र अस्ट्रेलियाका हुन् । उनीहरूमध्ये एक जना पनि अमेरिकी छैनन् ।
अमेरिकामा लामो समयदेखि सरकारी अधिकारी र विज्ञको एक समूहले चीनलाई एआईको क्षेत्रमा सबैभन्दा ठुलो खतरा बताउँदै आएको छ तर रिपोर्टले अमेरिकामा भइरहेका एआई अनुसन्धान धेरै हदसम्म चिनियाँ वैज्ञानिकको मदतले नै अघि बढिरहेका देखाउँछन् ।
मेटा पहिलेदेखि नै चिनियाँ वैज्ञानिकमा निकै निर्भर रहँदै आएको छ । कम्पनीभित्र अक्सर ठट्टामा भनिन्छ, नयाँ आउनेले दुई कुरा सिक्नुपर्छ : पहिलो– ह्याक (कम्पनीको प्रोग्रामिङ भाषा) र दोस्रो– मन्डारिन (चिनियाँ भाषा) किनभने एआई टिममा ठुलो सङ्ख्यामा चिनियाँ अनुसन्धानकर्ता हुन्छन् ।
यस वर्ष मेटाका लागि करिब ६,३०० एच–वानबी भिसा स्वीकृत भए, जुन अमेजनपछि सबैभन्दा धेरै हो । मेटाले सन् २०१८ यता कम्तीमा २८ ओटा अनुसन्धानपत्रमा चिनियाँ संस्थासँग मिलेर काम गरेको छ ।
मेटा मात्र होइन, एप्पल, गुगल, इन्टेल र सेल्सफोर्सजस्ता अमेरिकी कम्पनीले पनि चिनियाँ संस्थासँग मिलेर धेरै महत्त्वपूर्ण अनुसन्धान गरेका छन् । माइक्रोसफ्टले त सबैभन्दा धेरै अर्थात् कम्तीमा ९२ ओटा अनुसन्धान परियोजनामा साझेदारी गरेको छ । (एजेन्सी)
