काठमाडौं । मेलम्चीको पानी परीक्षणका लागि सुरुङभित्र पठाउन सुरु गरिएको छ । सुरुङमार्गको निर्माण सम्पन्न भएपछि परीक्षणका लागि आजबाट पानी पठाइएको हो ।
आज विहान ९ः ४५ बजेट अस्थायी बाँधबाट डाइभर्सन गरी सुरुङमार्गमा पानी प्रवाह सुरु गरिएको हो । हेडवर्क निर्माणको काम जारी रहेकाले सो स्थानभन्दा १ सय मिटर माथि निर्माण गरिएको अस्थायी बाँधबाट पानी प्रवाह सुरु गरिएको आयोजना प्रमुख तिरेश खत्रीले बताउनुभयो ।
उपत्यकामा पानी झर्न अझै २ महिना भन्दा बढी समय लाग्छ । सुरुङमा हालिएको पानी सुन्दरीजलसम्म पुग्न नै करिब ३ हप्ताको समय लाग्छ । आयोजनाको ९७ प्रतिशत काम सम्पन्न भइसकेको उहाँले बताउनुभयो ।
खानेपानी तथा सरसफाईमन्त्री बिना मगरले परीक्षणसँगै मेलम्ची आयोजनाका विषयमा उठ्ने गरेका सम्पूर्ण प्रश्नहरुको उत्तर मिलेको बताउनुभयो । मेलम्ची आयोजना निर्माणका क्रममा प्राकृतिक, सामाजिक र राजनीतिक रुपमा थुप्रै चुनौतीहरुको सामना गर्नुपरेको उहाँले बताउनुभयो ।
निर्माण कम्पनीसँग गरिएको सम्झौताको म्याद पुस मसान्तसम्म रहेको छ । निर्माण काम निर्धारित समयभन्दा पहिले नै सकिने विश्वास लिइएको छ ।
खोलाबाट अम्बाथान अडिटसम्म पानी पठाएर परीक्षण थालिएको हो । अम्बाथानको अडिट टनेलको ढोका बन्द गरेर सोमबार सुरुङमार्गतर्फ पानी पठाइँदैछ । सुरुङको गेट तथा सञ्चालन प्रविधि जडान सम्पन्न गरेपछि पानी पठाएर परीक्षण थालिएको हो ।
