काठमाडौँ । राष्ट्रिय जनमोर्चाका केन्द्रीय सल्लाहकार तथा वामपन्थी नेता आनन्द शर्माले संविधान र गणतन्त्रको रक्षा नेपाली तात्कालिक राजनीतिको प्रधान विषय भएको दाबी गर्नुभएको छ ।
अन्तर्राष्ट्रिय नेपाली एकता समाजले २०८२ कात्तिक २१ गते शुक्रबार अबेर रातिसम्म आयोजना गरेको भर्चुअल प्रशिक्षण कार्यक्रममा मन्तव्य राख्दै उहाँले सो अभिव्यक्ति दिनुभएको हो ।
‘नेकपा (मसाल) को नीति स्पष्ट छ’ उहाँले भन्नुभयो– ‘जे जे गर्दा संविधान र गणतन्त्रको रक्षा हुन्छ, मसालले त्यही त्यही काम गर्नेछ ।’
वर्तमान संविधानसित आफूहरूको मौलिक विरोध रहेको स्पष्ट पार्दै निरङ्कुश राजतन्त्रको अन्त गरेर गणतन्त्रको स्थापना वर्तमान संविधानको मूल सारतत्त्व भएको उहाँको दाबी थियो ।
उहाँले भन्नुभयो– ‘२०६२–६३ सालको जनआन्दोलनको उपलब्धि समाप्त पार्ने कार्यका विरुद्ध हामीले सङ्घर्ष गर्नेछौँ ।’
यतिखेर देशमा असंवैधानिक सरकार रहेको बताउँदै उहाँले संसद् पुनस्थापना वा चुनाव नभए देश भयङ्कर अप्ठ्यारो परिस्थितितर्फ जाने आशङ्का व्यक्त गर्नुभयो ।
‘फागुन २१ गते निस्पक्ष चुनाव भएन भने वा संसद् पुन:स्थापना भएन भने देश भयङ्कर अप्ठ्यारो परिस्थितितर्फ जानेछ’ उहाँले भन्नुभयो– ‘हामीले संसद् पुन:स्थापनाको पक्षमा आन्दोलन गर्ने छैनौँ तर संसद् पुनस्थापना भए त्यसलाई स्वागत गर्नेछौँ ।’
उहाँका अनुसार संसद् पुन:स्थापना भएमा वा फागुन २१ गते निस्पक्ष चुनाव भएका—यी दुवै परिस्थितिमा संविधान र गणतन्त्र कायम रहनेछ ।
राष्ट्रिय जनमोर्चाले फागुन २१ गते चुनाव हुन्छ भन्ने ठानेर चुनावको तयारी गर्ने निर्णय गरेको र सँगसँगै चुनाव हुने ग्यारेन्टी पनि नभएकाले चैतसम्मका कुनै पनि कार्यक्रम स्थगन नगरेको जानकारी उहाँले गराउनुभयो ।
जेनजी आन्दोलनको सन्दर्भ उठाउँदै उहाँले देशभित्र कुशासन भएका कारणले त्यसको विस्फोट जेनजीको रूपमा भएको स्पष्ट पार्नुभयो ।
कुनै समय जर्मनीमा चरम जनअसन्तोष व्याप्त भएका बेला त्यसको माझबाट हिटलरको फाशिष्ट शासनको उदय भएको तथा युक्रेनमा त्यहाँको जनअसन्तोषको फाइदा उठाउँदै साम्राज्यवादले जेलेन्स्कीको उदय गराएको उदाहरण नेता शर्माले दिनुभयो ।
जेनजी आन्दोलन मुख्यत: अमेरिकी साम्राज्यवादको योजनामा सञ्चालन भएको उहाँको ठम्याइ थियो ।
‘जेनजी आन्दोलनमा धेरैजसो अमेरिकी साम्राज्यवादको घुसपैठ थियो भन्न सकिन्छ’ उहाँले भन्नुभयो– ‘तर अझैसम्म भारतीय साम्राज्यवादको स्पष्ट भूमिका जेनजी आन्दोलनमा देखिएको छैन ।’
उहाँले जेनजी आन्दोलनमा धेरै कुरा स्पष्ट हुन अझै बाँकी रहे पनि ओली शासनको कुशासनको विरुद्ध जनअसन्तोषको रूपमा यो आन्दोलन विष्फोट भएकोमा विवाद नभएको उहाँको भनाइ थियो ।
अमेरिकाले आफ्नो हिन्दप्रसान्त रणनीति (आइपिएस) अन्तर्गत चीन घेर्ने रणनीति अगाडि सारेको उहाँले बताउनुभयो ।
‘नेपालमा मुख्य राजनीतिक दलहरू अमेरिकापरस्त त छन्’ उहाँले भन्नुभयो– ‘तर अमेरिकालाई नेपालमा यस्तो सरकार चाहिएको छ, जसले अमेरिकी स्वार्थअनुसार चीन वा भारतको विरुद्ध जान सकोस् ।’
एमसिसी नेपालको संसद्बाट पारित भएको उदाहरण दिँदै उहाँले अहिलेको जेनजी आन्दोलनमा पनि अमेरिकी साम्राज्यवादको उक्त सामरिक रणनीति अभिव्यक्त भएको बताउनुभयो ।
कार्यक्रममा नेकपा (मसाल) का प्रवक्ता रामप्रकाश पुरीले पनि प्रशिक्षण दिनुभएको थियो ।
समाजका अध्यक्ष शक्तमान बुढाथोकीको अध्यक्षता तथा सचिव तेजेन्द्र क्षेत्रीको सञ्चालनमा अघि बढेको उक्त कार्यक्रममा कार्यालय सचिव प्रकाश थापामगरले पनि सङ्क्षिप्त मन्तव्य राख्नुभएको थियो ।
कार्यक्रममा धनराज शर्मा, नवीन बस्याललगायतले पूरक जिज्ञासा राख्नुभएको थियो ।
