काठमाडौँ । चार किसान सङ्गठनले अविरल वर्षाका कारण क्षति ब्यहोरिरहेका किसानलाई राहत प्रदान गर्न माग गरेका छन् ।
अविरल वर्षाका कारण धानबाली, तरकारी, अन्य बालीनाली तथा पशुपन्छीपालनमा नोक्सान पुगेको बताउँदै उनीहरूले प्रेसवक्तव्य जारी गर्दैै राहत माग गरेका हुन् ।
२०८२ कात्तिक १७ गते जारी वक्तव्यमा अखिल नेपाल किसान महासङ्घ (अप्फा) का अध्यक्ष भैरवराज रेग्मी, क्रान्तिकारी किसान महासङ्घ नेपालका अध्यक्ष सीताराम तामाङ, अखिल नेपाल प्रगतिशील किसान महासङ्घका इन्चार्ज भुवन फुँयाल र अखिल नेपाल प्रगतिशील किसान सङ्घका अध्यक्ष दुर्गाप्रसाद जैशीको हस्ताक्षर रहेको छ ।
यस्तो छ, प्रेसवक्तव्यको पूर्ण पाठ :
“देशमा आएको पछिल्लो अविरल वर्षाले उत्पन्न भएको बाढीपहिरो र डुबानका कारण धानबालीलगायत तरकारीसमेत अन्य बालीनाली तथा पशुपन्छीपालनमा समेत ठुलो नोक्सान भएको छ । यसप्रति हामी देशमा क्रियाशील तथा जिम्मेवार चार किसान सङ्गठन अखिल नेपाल किसान महासङ्घ (अप्फा), क्रान्तिकारी किसान महासङ्घ नेपाल, अखिल नेपाल प्रगतिशील किसान महासङ्घ र अखिल नेपाल प्रगतिशील किसान सङ्घले संयुक्त रूपमा चिन्ता र दु:ख व्यक्त गर्दछौँ । यसरी बालीनालीमा ठुलो नोक्सानी ब्यहोरिरहेका सबै किसानलाई तत्काल यथेष्ट राहत प्रदान गर्न नोक्सानीको पूर्ण विवरण आएपछि थप उचित सहयोग किसानलाई आश्वस्त पार्न राज्यसँग जोडदार माग गर्दछौँ ।
आरम्भिक तथ्याङ्कअनुसार गएको असोज र चालु कात्तिक महिनामा आएको अविरल र असामयिक वर्षाका कारण उत्पन्न बाढीपहिरो र डुबानमा परेर किसानको कम्तीमा पनि पाँच अर्ब बराबरको नोक्सानी हुन पुगेको छ । यस बाढीपहिरो र डुबानमा परेर किसानको धानबाली, तरकारी र अन्य कृषिबालीमा मात्र तीन अर्बको नोक्सानी पुगेको बताइएको छ भने कृषि पूर्वाधार तथा पशुपन्छी र माछापालनमा सम्पूर्ण नोक्सानीको प्रारम्भिक आँकलन पाँच अर्बजतिको भएको उल्लेख छ । त्यसमा पनि सबैभन्दा बढी नोक्सानी मधेस प्रदेशमा हुनु पुगेको बताइएको छ ।
अत: यो नोक्सानीको भरपाइ हुने गरी किसानलाई सरकारले तत्काल राहत प्रदान गरोस् तथा प्राकृतिक प्रकोपको यो नोक्सानीबाट हुन सक्ने खाद्यान्न, तरकारी, माछामासु, दुग्ध पदार्थको अभाव हुन नदिन र मूल्यवृद्धि पनि हुन नदिन सरकारले ठोस राहत र समस्या समाधानको व्यावहारिक र मूर्त उपाय अगाडि सारोस् भन्ने पनि हामी जोडदार माग गर्दछौँ साथै लामो समयदेखि झुलाएर राखिएको ऊखु किसान र दुग्ध किसानले पाउनुपर्ने बक्यौता भुक्तानी रकम तत्काल एकमुष्ठ भुक्तानी दिन पनि हामी जोडदार माग गर्दछौँ ।”
