काठमाडौं । बारामा धान रोपाइँ गरिरहेका बेला चट्याङ लाग्दा चार जनाको मृत्यु भएको छ । चट्याङ लागेर फेटा गाउँपालिकाका ७ र कलैयामा एक जना गरी ८ जना घाइते भएका छन् । मृतक र घाइते सबै महिला हुन् । घाइते दुई जनाको अवस्था गम्भीर छ ।
फेटा गाउँपालिका–१ मा दुई तथा कलैया उपमहानगरपालिका–१२ मा दुई जना महिलाको चट्याङ लागेर मृत्यु भएको जिल्ला प्रहरी कार्यालय बाराले जनाएको छ ।
प्रहरीका अनुसार फेटा गाउँपालिका १ त्रिवेनीका ३० वर्षीया ईन्दु देवी र ४० वर्षीया सुनरपती देवी, कलैया उपमहानगरपालिका १२ स्थित शितलपुरकी ४५ वर्षीया हलिमा खातुन र ३५ वर्षीया आशादेवी महतोको चट्याङ लागेर मृत्यु भएको हो ।
गम्भीर घाइते बचैयादेवी हजामको कलैयामा उपचार भइरहेको छ । बाँकी सात जना घाइतेको वीरगञ्जमा उपचार भइरहेको प्रहरीले जनाएको छ ।
मृतक ईन्दु देवी महतो र सुनारपति देवी महतो एकै घरका हुन् ।
यस्तै, रौतहटको कटहरिया बजारस्थित एक घरमा चट्याङ लाग्दा लाखौँ बराबरको क्षति भएको छ । स्थानीय कृपाशंकर यादवको घरमा चट्याङ लागेर घरमा रहेको एकथान एलिडि टिभी, कम्प्युटर, राउटरलगायत लाखौँ बराबरको सामान पूर्णरुपमा क्षति भएको पीडित यादवले बताएका छन् ।
प्रदेश २ का सबैजसो जिल्लामा बिहानैदेखि मेघ गर्जनसहित ठूलो पानी परिरहेको छ।
