काठमाडौं । प्रहरीले काठमाडौं उपत्यका भित्रिन खोज्ने सयौं सवारी साधनलाई फिर्ता पठाइदिएको छ भने दर्जनौं नियन्त्रणमा लिएको छ । लकडाउनको उल्लंघन गरेर काठमाडौं आउन खोजेको भन्दै ति सवारी साधनलाई नाकाबाटै फिर्ता पठाइदिएको हो ।
गृह मन्त्रालयले दिएको जानकारी अनुसार बुधबार विभिन्न नाका भएर काठमाडौं आउन लागेका ३९० वटा सवारी साधनलाई प्रहरीले फिर्ता पठाइदिएको छ भने ७२ वटा नियन्त्रणमा लिएको छ ।
मन्त्रालयका अनुसार जगाती नाकाबाट १२३ वटा चार पाङ्ग्रे र १३० वटा दुई पाङ्ग्रे गरी २५३ वटा सवारी साधनलाई प्रहरीले फर्कादिएको छ भने ७२ वटा नियन्त्रणमा लिएको छ । ति सवारी साधनमा ५१५ जना यात्रु सवार थिए ।
यस्तै, फर्पिङ नाकाबाट ६ वटा चार पाङ्ग्रे र २० वटा दुई पाङ्ग्रे गरी २६ वटा नियन्त्रणमा लिएको छ जसमा २८ यात्रु थिए । नागढुंगा नाकाबाट ४६ वटा चार पाङ्ग्रे र ६५ वटा दुई पाङ्ग्रे गरी १११ वटा सवारी साधनलाई फिर्ता पठाएको मन्त्रालयले जनाएको छ ।
असार १ गतेदेखि लकडाउन केही खुकुलो भएपनि सार्वजनिक सवारी साधन सञ्चालनमा आएको छैन । सरकारले यातायातका साधनमा जोर विजोर प्रणाली लागू गर्नुका साथै काठमाडौं उपत्यका प्रवेश गर्न उपत्यकाको सम्बन्धित स्थानीय तहको सिफारिस, सम्बन्धित जिल्लाको स्थानीय तह र प्रहरीको स्वीकृति अनिवार्य बनाएको छ भने कोरोना परीक्षणको नेगेटिभ रिपोर्ट अनिवार्य बनाएको छ ।
