काठमाडौँ । निर्वाचन आयोगले असोज मसान्तसम्म दर्ता कायम रहेका एक सय २४ राजनीतिक दलको अद्यावधिक विवरण सार्वजनिक गरेको छ ।
सो विवरणमा राष्ट्रिय जनमोर्चा सत्ताइसौँ नम्बरमा दर्ता भएको छ । अध्यक्ष चित्रबहादुर केसी रहनुभएको राजमोको चुनाव चिह्न गिलास हो ।
आयोगले सार्वजनिक गरेको सूचीमा प्रत्येक दलको दर्तामिति, प्रमुख पदाधिकारी र तिनका निर्वाचन चिह्नसमेत समावेश गरिएको छ ।
सूचीको पहिलो स्थानमा नेपाल मजदुर किसान पार्टी रहेको छ, जसको चिह्न मादल हो । दोस्रो नम्बरमा नेकपा (माले) छ, जसको चुनाव चिह्न हँसिया र तारा हो ।
त्यस्तै नेकपा (एमाले) तेइसौँ नम्बरमा छ, जसको चुनाव चिह्न सूर्य हो । पच्चिसौँ नम्बरमा नेकपा (माओवादी केन्द्र) छ, जसको चुनाव चिह्न गोलाकारभित्र हँसिया–हथौडा रहेको छ । नेपाली कङ्ग्रेस छब्बिसौँ नम्बरमा दर्ता भएको छ, जसको चुनाव चिह्न रुख हो ।
एवम् प्रकारले जनमत पार्टी (सीके राउत) पचहत्तरौँ नम्बरमा, नेकपा (एकीकृत समाजवादी) अठासिऔँ नम्बरमा र लोकतान्त्रिक समाजवादी पार्टी (महन्थ ठाकुर) उनानब्बेऔँ नम्बरमा रहेका छन् ।
नेतृत्व परिवर्तन र फुटपछिका दल पनि दर्ता कायम छन् । नेकपा माओवादी समाजवादीका अध्यक्ष कर्णजित बुढाथोकी विप्लव समूहसँग आबद्ध भए पनि पार्टी आयोगमा कायम छ । त्यस्तै नेकपा एकता राष्ट्रिय अभियानका संयोजक वामदेव गौतम नेकपा (एस) मा समाहित भइसके पनि उनको पार्टी दर्तासूचीमै छ ।
त्यसबाहेक आम जनता पार्टी (प्रभु शाह), जनता प्रगतिशील पार्टी नेपाल (हृदयेश त्रिपाठी), नागरिक उन्मुक्ति पार्टी (रन्जिता श्रेष्ठ), नेपाल समाजवादी पार्टी (डा. बाबुराम भट्टराई) र राष्ट्रिय स्वतन्त्र पार्टी (रवि लामिछाने) पनि अद्यावधिक सूचीमा छन् ।
नयाँ दलमध्ये जनता समाजवादी पार्टी (अशोककुमार राई), राष्ट्रिय मुक्ति पार्टी नेपाल (राजेन्द्र महतो) पनि हालै दर्ता भएका हुन् । अन्तिम अर्थात् एक सय चौबिसौँ नम्बरमा जनमत पार्टी फुटेर बनेको जनस्वराज पार्टी २०८२ असोज २८ मा दर्ता भएको छ, जसको अध्यक्ष दीपककुमार साह छन् ।
यी सबै दल निर्वाचन आयोगमा दर्ता भइसकेकाले आगामी फागुन २१ गते तोकिएको प्रतिनिधि सभा निर्वाचनमा सहभागिता जनाउने योग्यता राख्छन् तर आयोगले निर्वाचन प्रयोजनका लागि दल दर्ता र नवीकरण प्रक्रियामा सहभागी हुनुपर्ने कानुनी प्रावधान भने यथावत् रहन्छ ।
