काठमाडौं । कोरोना भाइरस संक्रममण नित्रन्त्रणका लागि सरकारले लकडाउन घोषणा गरेको आज (बुधबार) एक सय दिन पूरा भएको छ । गत चैत ११ गते देशब्यापी लकडाउन घोषणा गर्दा देशमा दुई जना मात्र संक्रमित थिए भने लकडाउनको सय दिनमा संक्रमितको संख्या साढे १३ हजार नाघेको छ ।
स्वास्थ्य तथा जनसंख्या मन्त्रालयको तथ्यांक अनुसार मंगलबार साँझसम्म देशभर संक्रमितको संख्या १३ हजार पाँच सय ६४ पुगेको छ। संक्रमित २९ जनाको मृत्यु भइसकेको छ ।
यसबीचमा तीन हजार एक सय ९४ उपचारपछि निको भएका स्वास्थ्य मन्त्रालयले जनाएको छ । हाल देशभर दश हजार तीन सय ४१ जना संक्रमित उपचारको क्रममा छन् । देशभरका क्वारेन्टाइनमा ५३ हजार ७० जना रहेको स्वास्थ्य मन्त्रालयले जनाएको छ । देशका ७७ वटै जिल्लामा कोरोना फैलिएको छ।
यद्यपी असार १ गतेदेखि लकडाउनलाई केही खुकुलो बनाइएको छ । त्यस अनुसार जोर विजोर प्रणाली अनुसार सवारी साधन सञ्चालनमा आएका छन् । पसलहरु खुलेका छन् । तर, बढी भीडभाड हुने स्थानहरु, सार्वजनिक सवारी र विद्यालय सञ्चालनमा सरकारले रोक लगाएको छ ।
उद्धारको कामबाहेक हवाई यात्रा पनि खुलेको छैन । लकडाउनको अहिलेकै मोडालिटीलाई ७ साउनसम्म कायम राख्ने निर्णय सरकारले गरेको छ ।
पछिल्लो दिनमा कोरोना प्रति आम मानिसले वेवास्ता गर्न थालेका छन् । शहरमा भीडभाड बढिरहेको छ भने मास्क, स्यानिटाइजर जस्ता सुरक्षाका उपाय अपनाउनेको संख्या घट्दै गइरहेको छ ।
