काठमाडौँ । नेकपा (विप्लव) पक्षले सुशीला कार्की सरकार खारेज गर्दै संविधान संशोधन गर्न संविधान लेखन आयोग गठन गर्न माग गरेको छ ।
महासचिव नेत्रविक्रम चन्दको हस्ताक्षरमा २०८२ कात्तिक २ गते आइतबार नेपाल प्रज्ञा–प्रतिष्ठानमा पत्रकार सम्मेलन गर्दै सो माग गरेको हो ।
बहालवाला सुशीला कार्कीको सरकार खारेज गर्न माग गर्दै नेकपाले त्यसको स्थानमा जेनजी, किसान, मजदुर, महिला, दलित, जनजाति, मधेसी, बुद्धिजीवी, राजनीतिक दल सम्मिलित सर्वपक्षीय अन्तरिम सरकार गठन गर्न माग गरेको छ ।
“नयाँ बन्ने अन्तरिम सरकारले विशेष परिस्थितिमा कार्यकारी अधिकारको प्रयोग गर्दै संविधान संशोधन गर्नुपर्छ । एउटा उच्चस्तरीय संविधान लेखन आयोग गठन गर्नुपर्दछ” प्रेसवक्तव्यमा भनिएको छ– “संविधानको पुनर्लेखन गर्दै राज्यलाई पुनर्संरचना गर्दै प्रत्यक्ष कार्यकारी प्रमुखको व्यवस्था गर्दै उत्पीडित जातिको अग्राधिकारसहितको समाजवादी सङ्घीय राज्य निर्माण गर्नुपर्दछ ।”
वक्तव्यमा नेकपा आगामी फागुन २१ गतेको चुनावमा भाग लिन इच्छुक रहेको उल्लेख छ तर राजनीतिक तहको उच्चस्तरीय संयन्त्रविना सो चुनाव हुन नसक्ने सो पार्टीले निष्कर्ष निकालेको छ ।
“यो स्थितिमा राजनीतिक तहमा रूपान्तरित समझदारी एवम् संरचना खडा नगरेर वर्तमान अन्तरिम सरकारले सहजै चुनाव गर्न सक्ने स्थिति छैन” वक्तव्यमा उल्लेख छ ।
त्यस्तै नेकपाले तात्कालिक राजनीतिक परिस्थितिमा निकास दिन गोलमेच सम्मेलन आयोजना गर्नुपर्नेमा जोड दिएको छ ।
यस प्रसङ्गमा वक्तव्यमा भनिनएको छ– “देशलाई शान्ति, स्थिरता, स्वाधीनता र अग्रगामी निकास दिनका लागि नेकपाले देशभक्त, समाजवादी, वामपन्थी, कम्युनिस्ट शक्ति सम्मिलित राजनीतिक गोलमेच सम्मेलन आयोजना गर्न पहल गर्नेछ ।”
पार्टीले त्यसका लागि नागरिक, व्यवसायी र बुद्धिजीवीसँग अन्तरक्रिया गर्ने, त्यस सम्बन्धमा राष्ट्रपतिको ध्यान आकर्षण गराउन ज्ञापनपत्र बुझाउने र कात्तिक २० गते काठमाडौँमा जनसभा आयोजना गर्ने बताएको छ ।
वक्तव्यमा नेकपाले “नयाँ आर्थिक मार्ग” अन्तर्गत आत्मनिर्भर प्रणाली उत्साहजनक तरिकाले अगाडि बढेको, त्यस क्रममा बर्खेबाली सोचेभन्दा बढी उत्पादन भएको र सम्भव भएसम्म एकीकृत स्वामित्वअन्तर्गत कृषिउद्योग सञ्चालन गर्ने योजना रहेको बताएको छ ।
एवम् प्रकारले कालोधनबाट बचाउने भन्दै नेकपाले पाँच सय र हजारका नोट छाप्न बन्द गर्न माग गरिएको छ ।
गत असोज २६ देखि ३० गतेसम्म कपिलवस्तुमा बसेको बैठकले गरेका निर्णय सार्वजनिक गर्न सो पत्रकार सम्मेलन गरिएको बताइएको छ ।
