काठमाडौँ । क्रान्तिकारी कम्युनिस्ट पार्टी नेपालका महासचिव मोहन वैद्यले राजीनामा दिएका छन् । त्यसँगै कार्यवाहक महासचिवमा सी.पी. गजुरेल चयन भएका छन् ।
२०८२ कात्तिक १ गते समापन भएको केन्द्रीय समितिको तेस्रो पूर्ण बैठकले सो निर्णय गरेको हो ।
बैठकको सुरुमै महासचिव मोहन वैद्य किरणले आफ्नो स्वास्थ्य अवस्थाका कारणले दिनुभएको राजीनामा वाचन गरेर सुनाइएको थियो ।
उहाँले केन्द्रीय समितिलाई सम्बोधन गर्नुपर्ने माग भएपछि भर्चुअल रूपमा सम्बोधन गर्नुभएको थियो । महासचिव पदबाट आफूले दिएको राजीनामा स्वीकृत गरिदिन उहाँले केन्द्रीय समितिलाई अनुरोध गर्नुभएको थियो । त्यसपछि केन्द्रीय समितिले उहाँको राजिनामा स्वीकृत गर्दै रिक्त महासचिवको पदमा कार्यवाहक महासचिव सीपी गजुरेललाई चयन गरेको हो ।
कावा महासचिव गौरवको अध्यक्षता तथा स्थायी समिति सदस्य सुदर्शनको सञ्चालनमा असोज २९ देखि कात्तिक १ सम्म केन्द्रीय समितिको बैठक बसेको थियो ।
बैठकले महासचिव गौरवले प्रस्तुत गरेको राजनीतिक प्रतिवेदन व्यापक छलफलपश्चात आएका सुझावलाई समेटेर प्रतिवेदनलाई समृद्ध तुल्याउने गरी सर्वसम्मत रूपमा पारित गरिएको बताइएको छ ।
बैठकले जेनजी विद्रोहपछि बदलिँदो परिस्थितिको ठोस विश्लेषण गर्दै देशभक्त, गणतन्त्रवादी, क्रान्तिकारी जनवादी तथा वामपन्थी शक्तिका बिच संयुक्त मोर्चा निर्माण गरी स्वाधीन संयुक्त सरकारको पक्षमा व्यापक सङ्घर्ष उठाउन पहल गर्ने निर्णय गरेको जानकारी प्राप्त भएको छ ।
बैठकका निर्णयहरु चाँडै वक्तव्यमार्फत् सार्वजनिक गरिने बताइएको छ ।
