काठमाडौँ । गत भदौ २३–२४ गतेको जेनजी आन्दोलनमा नेपाली सेनाले आवश्यकताको सिद्धान्तअनुसार पहल लिएको दाबी गरेको छ ।
२०८२ असोज ३१ गते शुक्रबार युद्धकार्य विभागका प्रमुख उपरथी अनुपजङ्ग थापाले सेनाको तर्फबाट सो दाबी गर्नुभएको हो ।
थापाले जेनजी आन्दोलनको तरङ्ग केही अघिबाटै देखिएको भए पनि त्यसको ‘इभोलुसन’ अर्थात् विकासक्रम अचानक रूपमा प्रस्तुत भएको बताए ।
उनले भने– ‘जेनजी तरङ्ग केही अघिबाट देखिएको थियो तर सिलसिलेवार इभोलुसनमा प्रकट नभई अचानक प्रस्तुत हुन आइपुग्यो ।’
सेनाले उक्त परिस्थिति मनन गर्दै आवश्यकताको सिद्धान्तका आधारमा आवश्यक पहल लिएको उनको भनाइ थियो ।
‘आवश्यकताको सिद्धान्त मनन गरेर आवश्यक पहल लिएको हो । अन्य सुरक्षा निकायसँग काँधमा काँध मिलाएर सेनाले सहकार्य गर्दै आएको छ’ उनले भने ।
आन्दोलनलाई मत्थर बनाउन समयमै सेनाले पहल नलिएको विषयमा उठेका प्रश्नबारे थापाले भने– ‘त्यो प्रश्न आफैँमा विरोधाभासपूर्ण छ । हाम्रो उद्देश्य जनधनको सुरक्षा र राष्ट्रको रक्षा नै हो ।’
६२ स्थानमा सेनाको सुरक्षा तैनाथी
पत्रकार सम्मेलनमा सेनाले मुलुकका ६२ महत्त्वपूर्ण संरचना तथा कारागारमा सुरक्षा तैनाथ गरेको जनाएको छ ।
५० स्थानका कारागार, तीनओटा एयरपोर्ट, एक आयल निगम, तीनओटा अदालत, एक जिल्ला प्रशासन कार्यालय, राष्ट्रिय परीक्षा बोर्ड, परीक्षा नियन्त्रण कार्यालय, दूताबास क्षेत्र र कन्सुलेटग री ६२ स्थानमा सुरक्षा फौज तैनाथ रहेको सेनाले जनायो ।
काठमाडौँ उपत्यकाभित्र पाँच स्थान, उपत्यका बाहिर ५७ गरी जम्मा ६२ स्थानमा एक हजार ६२८ सेनाको सुरक्षा फौज तैनाथ गरिएको पनि सेनाले शुक्रबार पत्रकार सम्मेलन गरेर जनाएको छ ।
मृत्यु हुने ७६ मध्ये २२ प्रदर्शनकारी
सेनाले जेनजी आन्दोलनका क्रममा कुल ७६ मध्ये २२ जना प्रदर्शनकारीको मृत्यु भएको जनाएको छ । बाँकी मृतकमा तीन जना प्रहरी, १० जना कैदी र अन्य ४१ जना रहेको बताइएको छ ।
आन्दोलन चार सय ८४ स्थानमा भएको पनि उनले बताए । सेनाका अनुसार छ सय ८८ ओटा सरकारी कार्यालय, दुई ५९ ओटा निजी निवास, एक सय २८ ओटा व्यापारिक प्रतिष्ठान, एक ९८ ओटा राजनीतिक दलका कार्यालय, तीन सय सातओटा प्रहरी कार्यालयमा आगजनी तथा तोडफोड भएको छ ।
यस्तै आन्दोलनका क्रममा १५ हजार पाँच सय ८८ जना कैदीबन्दी भागेकोमा हालसम्म ८ हजार सात सय ९९ जनालाई पुन: नियन्त्रणमा लिइएको सेनाको भनाइ छ ।
सेनाले आन्दोलनकै क्रममा नौ सय ७८ थान हतियार हराएकोमा पाँच सय ८६ ओटा फिर्ता गराइएको पनि आफ्नो रिपोर्टमा उल्लेख गरेको छ ।
