काठमाडौँ । गत भदौ २३–२४ गतेको जेनजी आन्दोलनको क्रममा नेपाली काङ्ग्रेसको केन्द्रीय कार्यालयसहित ४८ सदस्यका जिल्लाका कार्यालय तथा करिब एक सय २५ नेताकार्यकर्ताको घरमा आक्रमण भएको छ ।
सभापति शेरबहादुर देउवाले २०८२ असोज २८ गते मङ्गलबार केन्द्रीय समिति बैठकमा लिखित मन्तव्य राख्दै सो जानकारी दिएका हुन् ।
वक्तव्यमा मोरङको विराटनगरस्थित कोइराला निवास, काठमाडौँ चाक्सीबारीस्थित गणेशमान सिंह निवास र ललितपुर बाँडेगाउँस्थित कृष्णप्रसाद भट्टराईको भवन पनि जलाएर खरानी बनाइएको उल्लेख छ ।
देउवाले राष्ट्रपति रामचन्द्र पौडेललाई कठिन अवस्थामा महत्त्वपूर्ण र परिपक्व भूमिका खेलेकोमा धन्यवाद व्यक्त गरेका छन् ।
जेनजी आन्दोलनमा उठेको सुशासन र भ्रष्टाचारमुक्त मागलाई समर्थन गर्दै देउवाले उक्त आन्दोलन आकस्मिक वा स्वत:स्फूर्तभन्दा पनि सुनियोजित र योजनाबद्ध थियो भन्ने उल्लेख गरेका छन् ।
सभापति देउवाले आगामी पन्ध्रौँ महाधिवेशनबाट आफू नेतृत्वमा नरहने घोषणा गर्दै उपसभापति पूर्णबहादुर खड्कालाई कार्यवाहक सभापति दिएका छन् । त्यसका पछाडि स्वास्थ्यको कारण देखाएका छन् ।
उनले भनेका छन्– “घरमा सधैँ एकै जना मुली रहँदैन । पार्टीमा पनि हमेसा एकै जना सभापति रहिरहँदैन । जहाँसम्म मेरो विषय छ, मैले पहिले नै हाम्रो वैधानिक व्यवस्थाले र मेरो राजनीतिक इच्छाले पन्धौँ महाधिवेशनबाट पार्टी नेतृत्वमा विधिवत: रूपमा हस्ताक्षर गर्छु भनिसकेको छु । आगामी पन्ध्रौँ महाधिवेशनबाट मबाहेक अरू साथी सभापति बन्नुहुनेछ, त्यसमा द्विविधा छैन ।”
मन्तव्यमा प्रतिनिधिसभा असंवैधानिक तथा अलोकतान्त्रिक तबरले विघटन गरिएको बताउँदै यस विषयमा लोकतान्त्रिक व्यवस्थाप्रति आस्थावान् अन्य राजनीतिक दलसित संवाद र सहकार्य गर्ने उल्लेख छ ।
फागुन २१ गतेको निर्वाचन सन्दर्भमा देउवाले शान्तिसुरक्षाको ग्यारेन्टी तथा निष्पक्ष र भयरित वातावरणमा निर्वाचनको वातावरण तयार पार्न सरकारको ध्यानकर्षण गराएका छन् । सरकारले राजनीतिक दलसित सार्थक संवाद नगरेकोका उनले आलोचना गरेका छन् ।
आफूलाई धेरैपटक प्रधानमन्त्री बनेको आरोपबारे उनले सफाइ दिएका छन्– “मैले छोटो समयका लागि भए पनि पाँचपटक प्रधानमन्त्री हुने अवसर पाएँ । पाँचपटक प्रधानमन्त्री हुँदा करिब एक कार्यकालको समय थियो । त्यसमा पनि अधिकांश चुनावी सरकारको नेतृत्व गरेको थिएँ ।”
आफूमाथि भदौ २४ गते आफू समेतमाथि भएको आक्रमणलाई उनले समग्र देश, पद्धति र पार्टीमाथिको आक्रमण बताएका छन् ।
