काठमाडाँ । ‘बरमझियाको पेडा’ झैँ कुन वास्तविक जेनजी हो भन्ने किटानी भइनसकेका बेला सिन्धुपाल्चोकस्थित भोटेकोशी जलविद्युत् आयोजनामा उनीहरूले दश प्रतिशत सेयर हत्याएका छन् ।
जेनजीको नाममा विभिन्न समूह देखा परेपछिको अराजकतापूर्ण अवस्थामा उनीहरूले सेयर हत्याएका हुन् ।
असोज २६ गते सिन्धुपाल्चोकको भोटेकोशी गाउँपालिकाको एउटा समूहले जेनजीको नाममा ४५ मेगावाटको भोटेकोशी जलविद्युत् आयोजनामा १० प्रतिशत सेयर हत्याउन सफल भयो । उनीहरूलाई १९ करोड रुपैयाँ बराबरको सेयर दिने लिखित सम्झौता नै भएको छ । जेनजी आन्दोलनपछि उदाएको उक्त समूहले १० प्रतिशत नि:शुल्क सेयर माग्दै २५ गतेदेखि आयोजना सञ्चालन गर्न दिएको थिएन ।
अहिलेसम्म जेनजीका नाममा कुनै पनि राजनीतिक वा गैरराजनीतिक समूह र सङ्गठन दर्ता छैन । जेनजी नाम जोडेर एउटा लेटरहेड बनाउने र विज्ञप्ति जारी गर्ने होड नै चलेको छ । तिनै विज्ञप्तिका आधारमा समाचार बनाउन सञ्चारमाध्यम बाध्य छन् ।
जेनजी आन्दोलनलाई ‘बरमझियाको पेडा’ को रूपमा टिप्पणी गर्न थालिदएको छ । बरमझियामा रहेकामध्ये असली ’पुरानो बाजेको पेडा पसल’ कुन हो ? छुट्याउने आधारै छैन ।
जेनजी शब्दले युवाको त्यो समूहलाई जनाउँछ, जो अहिले १३ देखि २८ वर्षसम्म उमेरका छन् तर जेनजीका नेता भएर हिँडेका सुधन गुरुङ ३८ वर्षका वयस्क हुन् । अर्का चर्चित जेनजी अगुवा हुन् मिराज ढुङ्गाना । सामाजिक सञ्जाल, खासगरी टिकटकबाट जेनजी अभियानको उठान गर्न उनको भूमिका थियो तर भदौ २३ गरेको आन्दोलनमा उनी सडकमै आएनन् । आफूलाई थ्रेट आएकाले आन्दोलनमा सहभागी हुन नसकेको र दिनभरि आफ्नो व्यवसाय हेरेर बसेको उनको भनाइ छ ।
यी दुईबाहेक रक्षा बमको नाम चर्चामा छ । उनले जेनजी अभियन्ताका नाममा थुप्रै अन्तरवार्ता दिएकी छन् । कतिपयले उनलाई ‘बौद्धिक जेनजी’ का रूपमा पनि हेरेका थिए तर, एउटा तस्बिरले उनलाई नराम्ररी एक्सपोज गर्यो, जहाँ उनी जलिरहेको सिंहदरबार गेट अगाडि उभिएर खुसी मनाइरहेको देखिइन् । देशको ऐतिहासिक सम्पदा जल्दा ‘भिक्ट्री सेलिब्रेसन’ गर्नुले नै रक्षाको बौद्धिकस्तर छताछुल्ल बनाइदिएको छ ।
अन्य केही युवायुवती पनि चर्चामा छन् तर कोही पनि सर्वस्वीकार्य छैनन् । जेनजी आन्दोलनका कारण सरकार परिवर्तन र चुनाव घोषणा भयो तर त्यस क्रममा कुनै लिखित सम्झौता कसैसँग भएको छैन ।
