धनवीर पुनमगर, भरतपुर ।
चितवनको भरतपुरमा जारी अखिल नेपाल जनजाति सम्मेलनको पाँचौँ राष्ट्रिय महाधिवेशनको बन्दसत्र चलिरहेको छ ।
हिजो असोज २६ गते साँझदेखि सुरु भएको बन्दसत्रमा आज असोज २७ गते पनि जारी रहेको हो ।
बन्दसत्र सञ्चालनका लागि महासचिव अमरध्वज राना, केन्द्रीय सचिव उषा पुन र पूर्व केन्द्रीय सदस्य रामबहादुर जिएमसमेतको अध्यक्षमण्डल गठन भएको थियो ।
अध्यक्ष निमबहादुर बुढाथोकीले बन्दसत्रमा साङ्गठनिक प्रतिवेदन प्रस्तुत गर्नुभएको थियो ।
त्यस्तै घोषणापत्र तथा विधानमाथिको संशोधन प्रस्ताव र विशेष प्रस्ताव महासचिव रानाले प्रस्तुत गर्नुभएको थियो ।
बन्दसत्रमा करिब २५/२५ जनाको चारओटा टोली बनाएर समूह छलफल चलेको थियो । अहिलेसम्म सबै समूहका नेताहरूले सुझाव प्रस्तुत गरिसकेका छन् ।
दिउसोको खानापछि दस्तावेज प्रस्तोताले स्पष्टीकरण दिने कार्यक्रम रहेको छ । त्यसपछि सबै दस्तावेज पारित गरिने छ र त्यसपश्चात् नयाँ नेतृत्व चयनको प्रक्रिया अगाडि बढ्नेछ ।
